КЕНТАУДА ОБЛЫСТЫҚ КОМПОЗИТОРЛАР БАЙҚАУЫ ӨТТІ

Кентау қаласының 70 жылдығына орай «Кентау – шабытымның шырағы» атты облыстық композиторлар байқауы өтті. Шараға Түркістан облысына қарасты аудан-қалалардан 15-ке жуық сазгер қатысып, өз туындыларын паш етті.

 

Облыстық байқауда әділ төрелік еткен қазылар алқасы құрамында ҚР Білім беру ісінің үздігі, бүкіл Одақтық шығармашылық фестивальдерінің лауреаты композитор, ұстаз Әлімбек Қонысбеков, «Облыстық мәдениет және халық шығармашылығы орталығы» «Халық шығармашылығын қамтамасыз ету» бөлім жетекшісі, ҚР Мәдениет саласының үздігі Зағипа Өмірзақова және Балалар саз мектебінің эстрадалы-үрмелі аспаптар бөлімінің мұғалімі Жұмахан Киізбаев болды.

 

Сөз бен саздың үйлесімділігін сарапқа салған қазылар алқасы байқау нәтижесін шығарды. Кентау қаласына арналған әсем әндер байқауының нәтижесі бойынша Бас жүлде Созақ ауданынан келген сазгер Байс Мамырғалиға бұйырды. 1-орынды кентаулық әнші әрі сазгер Ерғали Шырынбеков, 2-орынды Мақтаарал ауданы Серғазы Байдуллаев иеленсе, 3-орынды Келес ауданына Заман Нұрханов пен Жетісай ауданынан келгнен сазгер Қуаныш Спанов ие болды.

 

Кентау жайында керемет әндерді паш еткен жеңімпаздар мен қатысушыларға арнайы дипломдар мен сыйлықтар табыс етілді.