Жаңалық

Түркістан облысында шегіртке мен ауыл шаруашылығы зиянкестеріне қарсы күрес үздіксіз жүргізіліп жатыр. Аталған мәселе облыс әкімі Нұралхан Көшеровтың тұрақты бақылауында. Бүгінгі таңда Түркістан облысының аумағында 866,7 гектар жер зерттеліп, оның 359,8 мың гектары өңделді. Облыс әкімінің тапсырмасымен барлық жұмыстар жүйелі түрде жүргізілуде. Атқарылған жұмыстың есебі облыс әкімінің орынбасары Нұрбол Тұрашбековтің төрағалығымен өткен штаб отырысында қаралды.

Зерттелген алқаптарда экономикалық зиянды шегінен асқан 362,5 мың гектар анықталған. Дәріленген аймақтарға бақылаушылар тарапынан жүргізілген тексеру нәтижесі баяндалып, облыстағы фитосанитариялық ахуалдың тұрақтылығы сараланды.

Арыс қаласы бойынша Сарыағаш ауданымен шектесетін 10-секторға күш салынуда. 10 және 14 секторларда 1000 гектардаг астам жер өңделуде. 19-23 секторлар зиянкестен тазаланып аяқталған. Дегенмен, анықтаушылар арқылы аймақтардағы бақылауды жалғастыру ұсынылды. Арыс қаласының әкімі Қайсар Маңқараев 1-8 секторларда қайта зерделеуге 100-ге жуық анықтаушы жұмылдырылғанын атап өтті.

Келес ауданында 23 және 26 секторда тазалау жұмыстары атқарылуда. 32-33 сектор аралығында жаңа ошақтар анықталып, 700 гектарға жуық алқапта химиялық өңдеу басталды. Шардара ауданымен шектесетін 23, 29, 30 секторларда жағдай тұрақты.

Сарыағаш ауданы бойынша 6 секторда 2 күндік жұмыс қалған. Атап айтқанда, 40-секторда 115 гектар, 47 секторда 10 гектар, 49 секторда 8 гектар, 50 секторда 70 гектар, 51 секторда 155 гектар алқап дәріленуде. Жалпы аудан бойынша тазаланған аумақ 96,6 мың гектарды құрап отыр. Бүгінгі таңда ауданда өңдеуге 35 техника жұмылдырылған. Аудан әкімі Арман Абдуллаев егістіктер мен ауданаралық шекаралас аймақтар ерекше қадағалауға алынғанын жеткізді.

Қазығұрт ауданында шегіртке дернәсілдері 2-3 жас кезеңге өткен. Техникалармен қатар таулы аймақтарға дрон және шекаралас аймақтарға аспалы бүріккіштер қолданылуда. Бүгінгі таңда 3,8 мың гектар химиялық өңдеуден өткен.

Нұрбол Тұрашбеков атқарылған жұмыстарды зерделей келе жауаптыларға бірқатар тапсырмалар жүктеді. Бақылаушыларға бекітілген алаңнан бөлек, қосымша таңдаулы тексерістер жүргізу ұсынылды.

Түркістан облысы әкімінің баспасөз қызметі