Жаңалық

Түркістан облысына инвестиция тарту, өңір экономикасын дамыту арқылы кәсіпкерлік саласын жетілдіру бағытындағы жұмыстар өз нәтижесін беріп келеді. Сонымен қатар шетелдік компаниялармен тәжірибе алмасу арқылы өңірге инвестиция тарту шаралары ұдайы жүргізілуде. Осы және өзге де мәселелер Түркістан облысы әкімінің орынбасары Талғат Қозбековтың төрағалығымен өткен мәжілісте талқыланды.

Жиынға салаға жауапты мамандар қатысып, өңірдегі инвестициялық жобалардың ағымдағы жағдайы мен «TURKISTAN» индустриалды аймағы және «Turan» арнайы экономикалық аумағындағы өзекті мәселелер жайын баяндады.

Кеңес барысында облыста жүзеге асып жатқан инвестициялық жобалардың кезең-кезеңімен іске асырылуы, инфрақұрылыммен қамтамасыз ету, инвесторларға қолдау көрсету және әкімшілік кедергілерді азайту мәселелері зерделенді.

Сонымен қатар арнайы экономикалық және индустриалды аймақтардағы инфрақұрылым жұмыстарын жеделдету, жер телімдерін рәсімдеу, қажетті инженерлік желілермен қамту жұмыстары мен кәсіпкерлердің ұсыныстарын ескере отырып, олармен өзара байланысты нығайту бағытындағы түйткілдер айтылып, нақты тапсырмалар жүктелді. Облыс әкімінің орынбасары Талғат Қозбеков салаға жауапты мамандар мен еншілес компания басшыларына аталған жобаларды сапалы әрі уақтында жүзеге асыруды тапсырды.

Түркістан облысы әкімінің баспасөз қызметі