КЕНТАУДА ЕРКІН КҮРЕСТЕН «НАУРЫЗ» РЕСПУБЛИКАЛЫҚ ТУРНИРІ БАСТАЛДЫ

Наурызнама онкүндігі аясында атап өтілетін «Ұлттық спорт» күні қарсаңында Кентау қаласында еркін күрестен республикалық турнирдің ашылу рәсімі өтті.

Дүбірлі дода қаладағы Б.Саттарханов атындағы №1 балалар мен жасөспірімдер спорт мектебінде өтуде. Наурыз мейрамына орай ұйымдастырылған жарыс 19–22 наурыз күндері аралығын қамтиды.

Аталған турнирге еліміздің түкпір-түкпірінен, атап айтқанда Атырау, Алматы, Жамбыл облыстарынан, Алматы қаласынан, сондай-ақ Түркістан облысының барлық аудан-қалаларынан келген 42 команда қатысуда. Жалпы саны 430-ға жуық жас балуан боз кілемде бақ сынайды.

Бұл жарыс – жас спортшылар үшін тәжірибе алмасып, шеберліктерін шыңдауға, сондай-ақ болашақ чемпиондардың қалыптасуына жол ашатын маңызды алаң. Үш күнге созылатын тартысты бәсекеде балуандар өзара мықтыларды анықтап, жеңіс тұғырынан көрінуге бар күш-жігерлерін салатын болады.

Ұлттық спортты дәріптеуге бағытталған мұндай ауқымды жарыстар жас ұрпақты салауатты өмір салтына баулып, отансүйгіштік рухты нығайтуға зор үлес қосады