КЕЛЕС АУДАНЫНДА 15 МЫҢ ГҮЛ КӨШЕТІ ОТЫРҒЫЗЫЛДЫ

КЕЛЕС АУДАНЫНДА 15 МЫҢ ГҮЛ КӨШЕТІ ОТЫРҒЫЗЫЛДЫ
Келес ауданының орталығы Абай ауылында көктемгі сенбіліктер дәстүрге айналып, биыл да ерекше қарқынмен өтіп жатыр. Ауылдың тазалығы мен көркі – тұрғындар игілігі үшін атқарылып жатқан бұл жұмыстарға әкімдік қызметкерлері, қоғамдық жұмысшылар және арнайы техникалар жұмылдырылған.

Қазіргі таңда ауыл ішіндегі негізгі көшелер – Б.Қырғызалиев, Д.Қонаев, Асан Қайғы және Т.Рысқұлов көшелері бойында санитарлық-тазалық жұмыстары жүйелі түрде жүргізілуде. Көше бойларында өсіп кеткен арамшөптер орылып, қоқыс пен күл-қалдықтар тазартылуда. Ауыл тазалығы – тек эстетикалық мәселе емес, сонымен қатар тұрғындардың денсаулығына да тікелей әсер ететін маңызды фактор екенін ескерсек, бұл жұмыстардың маңызы айқындала түседі.

Абаттандыру шараларының тағы бір жарқын көрінісі – көше бойларына отырғызылған гүлдер. Жалпы саны 15 000-ға жуық гүл көшеттері ауыл көшелеріне ерекше сән беріп, көрген жанның көңілін көтеруде. Түрлі түсті гүлдермен көмкерілген саябақтар мен жол жиегі – Абай ауылының тек ішкі ғана емес, сыртқы келбетін де көркейтіп отыр.

Сонымен қатар Т.Рысқұлов көшесінің бойындағы 1000-ға жуық бордюрге сырлау жұмыстары жүргізілуде. Бұл жұмыстар да ауылдың сәулеттік сәнін арттырып, тиянақты, таза көрініс қалыптастыруға бағытталған. Сырланған бордюрлер – тек көз тартарлық көрініс қана емес, жаяу жүргіншілер мен жүргізушілер үшін де қауіпсіздік элементі саналады.

🔗 Келес ауданы әкімдігінің баспасөз қызметі