КЕЛЕС: 400-ДЕН АСА ПЕДАГОГТЫҢ БАСЫН ҚОСҚАН ТАМЫЗ КЕҢЕСІ ӨТТІ

Келес ауданында жаңа оқу жылына арналған білім беру қызметкерлерінің дәстүрлі тамыз кеңесі өтті. Тамыз кеңесі 400-ден аса аудан педагогтарының басын қосты. Оқушылардың жүрекжарды құттықтауларымен басталған жиын “Білім келешегі: адал азамат, кәсіби маман” тақырыбында өтті.

Тамыз кеңесіне Келес ауданының әкімі Жәнібек Ағыбаеварнайы қатысып, жиылғандарды жаңа оқу жылының басталуымен құттықтады.

— Бүгінгі Тамыз кеңесі – жаңа оқу жылының табысты басталуына жол ашатын маңызды басқосу. Ауданымызда білім сапасын арттыру, мектептердің жағдайын жақсарту бағытында жұмыстар жалғасуда. Шәкірт тәрбиелеудегі адал қызметтеріңіз үшін шынайы алғыс айтамын. Жаңа оқу жылы құтты болып, толағай табыстарға толы болсын, - деді аудан басшысы.

Дәстүрлі түрде ұйымдастырылатын Тамыз кеңесіне Түркістан облысы білім басқармасы Білім беруді дамыту орталығының директоры Гүлжамал Жораева, «Өрлеу» біліктілікті арттыру ұлттық орталығының Түркістан облысы бойынша кәсіби даму институты филиалының кафедра меңгерушісі, педагогика ғылымдарының кандидаты Майра Құдайбергенова, WEGLOBAL.AI жобасының психологиялық қолдау орталығының маманы Нұрғали Уәлихан, аудандық мәслихат төрағасы Нұржан Шаулиев, аудандық мәслихат депутаттары, ауылдық округ әкімдері, бөлім басшылары, мектеп директорлары, балабақша меңгерушілері мен ардагер ұстаздар қатысты.

Келес ауданы білім бөлімінің басшысы Рахат Жайлаубай өткен оқу жылындағы атқарылған жұмыстарға тоқталып, жаңа оқу жылының міндеттерін айқындап берді. Бөлім басшысы өз баяндамасында білім беру сапасын арттыруда “Адал азамат” құндылықтарын қалыптастыру да маңызды екенін атап өтті.

Жиында қонақтар жаңа оқу жылы қарсаңында бірқатар ұстаздарға марапаттар табыстады. Сонымен қатар, ардагер ұстаздарға ерекше құрмет көрсетіліп, оқушылар гүл шоқтарын ұсынды. Одан кейін Түркістан облысы білім басқармасы Білім беруді дамыту орталығының директоры Гүлжамал Төлегенқызы құттықтау сөз сөйлеп, білім саласындағы өзекті мәселелерге тоқталды.

Кеңес барысында жарыссөзге қатысқан WEGLOBAL.AI жобасының маманы Нұрғали Өмірғалиұлы, педагогика ғылымдарының кандидаты Майра Құдайбергенова, «Ерен еңбегі үшін» медалінің иегері, №4 Жүсіп Баласағұн атындағы мектептің математика пәні мұғалімі Нұртас Айтілеуов өз ойларын ортаға салды.

Келес ауданы әкімдігінің баспасөз қызметі