КЕЛЕС: АБАЙ АУЫЛЫНДА 15 МЫҢ ТҮП ГҮЛ ЕГІЛДІ

Келес ауданының орталығы Абай ауылы соңғы уақытта көркейіп, түрленіп келеді. Қолға алынған абаттандыру және инфрақұрылымды дамыту жұмыстары ауылдың ажарын ашып, тұрғындардың көңілін қуантты.

Биылғы көктемде ауыл аумағына 850 түп көшет отырғызылып, олардың көбі мектеп, балабақша секілді әлеуметтік нысандардың маңына және мөлтек аудандарға егілді. Ал ауылдың басты көшелері – М.Артықов, Д.Қонаев және Б.Қырғызалиев бойына 15 мыңға жуық гүл егілді. Бұл жұмыстар ауыл орталығына ерекше көрік берді.

Жаздың жайма шуақ күндері ауыл балалары үшін жаңа ойын алаңшалары есігін айқара ашты. «Ардагерлер» аллеясында және Т.Рысқұлов көшесіндегі №103 үй ауласында заманауи ойын алаңы мен спортпен шұғылдануға арналған воркаут алаңы пайдалануға берілді. Бұл ауыл жастарының салауатты өмір салтын қалыптастыруына үлкен мүмкіндік туғызды.

Қараңғыда жол іздеп әлек болатын күндер артта қалды. Биылғы жылы 28 көшеге 380 жарық шамы орнатылып, бүгінде ауыл көшелерінің 80 пайызы жарықтандырылды. Бұл тек ауылдың түнгі келбетін айшықтап қана қоймай, тұрғындардың қауіпсіздігін қамтамасыз етіп отыр.

Абай ауылындағы Асан қайғы, Ә.Жылқышиев, Т.Бегманова, Ынтымақ, А.Омаров, Қ.Сәтбаев, Жамбыл көшелері мен «Араншы» каналы аумағын абаттандыру бойынша жобалар әзірленіп, облыстық бюджеттен қаржы қаралды. Қазіргі таңда аяқжол төсеу, бордюр қою, жарық шамдарын орнату жұмыстары басталып кетті.

Сонымен қатар ауыл тұрғындары үшін маңызды ғимараттардың бірі – Т.Рысқұлов көшесіндегі жатақхана да назардан тыс қалмады. Қазіргі таңда бұл нысанда ағымдағы жөндеу жұмыстары жүргізілуде. Құрылыс жұмыстарын «KazNurDeluxe» ЖШС атқаруда.