КЕЛЕС АУДАНЫНДАҒЫ БІЛІМ ОШАҚТАРЫ ЖАҢҒЫРТЫЛЫП ЖАТЫР

Келес ауданында жаңа оқу жылына дайындық жұмыстары қарқынды жүргізілуде. Аудан әкімінің орынбасары Дәурен Сариев реновация жобасы аясында күрделі жөндеуден өтіп жатқан екі білім ордасының ахуалымен танысып, мердігерлермен кездесті.

Қазіргі таңда №1 О.Есімов атындағы жалпы білім беретін мектебі мен №4 Ж.Баласағұн атындағы жалпы білім беретін мектебі – толық жаңғырту жұмыстары жүргізіліп жатқан нысандар қатарында.

Реновация жобасы аясында ғимараттардың ішкі және сыртқы инженерлік жүйелері толық ауыстырылып, мектеп жиһаздары жаңартылуда. Сондай-ақ санитарлық тораптар заманауи талаптарға сай қайта жабдықталуда.

Дәурен Сариев мердігер ұйымдардың өкілдеріне жұмыстың сапасына ерекше мән беруді және жаңа оқу жылы басталғанға дейін барлық жөндеу жұмыстарын аяқтауды тапсырды.

— Білім беру мекемелерінің уақытында және сапалы дайындалуы – жаңа оқу жылының сәтті басталуының кепілі. Бұл – тек инфрақұрылымдық мәселе емес, оқушылар мен ұстаздардың жайлы әрі қауіпсіз ортада білім алуына жасалған жағдай, – деді аудан әкімінің орынбасары.

Айта кетейік, №1 О.Есімов атындағы жалпы білім беретін мектебінде 1100-ден аса оқушы, ал №4 Ж.Баласағұн атындағы жалпы білім беретін мектебінде 600-ден астам оқушы білім алады. Жаңартылған мектептерде жаңа оқу жылы қарсаңында балаларды жайлы және заманауи білім беру ортасы күтіп тұрмақ.