ТҮРКІСТАНДА СОҢҒЫ ҚОҢЫРАУ МЕН ОҚУШЫЛАР ҚАУІПСІЗДІГІ БАСТЫ НАЗАРДА

Түркістан қаласының әкімі Әзімбек Пазылбекұлының төрағалығымен жалпы білім беретін мектептерде 2025–2026 оқу жылын қорытындылау, соңғы қоңырау салтанатты іс-шарасын өткізу және оқушылардың жазғы демалысын тиімді ұйымдастыру мәселелері бойынша мәжіліс өтті.

Қалада бүгінде 82 білім беру ұйымы жұмыс істейді. Оның 38-і мемлекеттік, 44-і жекеменшік. Жалпы 59 772 оқушы білім алуда. Биыл 9-сыныпты 4218 оқушы аяқтайды, оның 413-і «Үздік аттестатқа» үміткер. 11-сыныпты 3268 түлек тәмамдайды. Оның ішінде 243-і «Алтын белгіге», 254-і «Үздік аттестатқа» үміткер. ҰБТ-ға 2686 түлек қатысуға ниетті.

«Сыңғырла, соңғы қоңырау – 2026» салтанатты шарасы 25 мамыр күні барлық мектептерде сағат 09:00-де өтеді. Іс-шараның ұзақтығы 45 минуттан аспайды және мектеп аумағында немесе көлеңкелі жабық орындарда ұйымдастырылады.

Мәжілісте қауіпсіздік пен тәртіп мәселелеріне ерекше назар аударылып, ата-аналардан қаржы жинауға, мұғалімдерге сыйлық беруге, сән-салтанатты бітіру кештерін өткізуге, автокөлікпен серуендеуге, дастархан жаюға және әуе шарларын ұшыруға тыйым салынатыны ескертілді.

Жазғы демалыс кезеңінде «Балауса» сауықтыру лагерінде 7 ауысым бойынша 1450 баланы қамту жоспарланған. Сондай-ақ 26 мамыр мен 20 маусым аралығында мектеп жанындағы сауықтыру алаңдарында 1–6 сынып оқушыларынан 7200 баланың демалысы ұйымдастырылады.

Қала әкімі жауапты сала басшыларына соңғы қоңырау іс-шараларын жоғары деңгейде өткізіп, оқушылардың қауіпсіздігін толық қамтамасыз етуді және жазғы сауықтыру жұмыстарын қатаң бақылауда ұстауды тапсырды.