КЕЛЕС АУДАНЫНДА ЕРТЕ КӨКТЕМГІ ЕГІСТІК ЖҰМЫСТАРЫ БАСТАЛДЫ

Келес ауданында ерте көктемгі егістік жұмыстары басталды. Аудан шаруалары ауа райының қолайлы кезеңін тиімді пайдаланып, ерте пісетін көкөніс дақылдарын егуге кірісті. Атап айтқанда, Біртілек, Қошқарата, Алпамыс батыр және Ақтөбе ауылдық округтерінде қырыққабат, сәбіз және картоп дақылдары егілуде. Биыл аудан көлемінде ерте пісетін көкөніс өнімдерін 6,4 мың гектар алқапқа, ал картопты 1 мың гектар жерге егу жоспарланған. Бүгінгі күнге дейін 110 гектар жерге көкөніс дақылдары, 50 гектар алқапқа картоп егілген.

Алпамыс батыр ауылдық округіндегі шаруа қожалығының иесі Бекжан Хантөре биыл 5 гектар жерге қырыққабаттың «Фарао» сортын еккенін айтады.

«Егу жұмыстарын биыл ертерек бастадық. Ауа райы қолайлы, топырақ та толық дайын. «Фарао» қырыққабаты екі айдың ішінде пісіп жетіледі әрі нарықтағы сұранысы жоғары. Күтімі дұрыс болса, өнім де сапалы болады деп сенеміз. Алдағы уақытта жиналған өнімді ішкі нарықпен қатар, шет мемлекеттерге экспорттауды да жоспарлап отырмыз. Қазіргі таңда алқапта 8 адам тұрақты жұмыспен қамтылған», – дейді шаруа.

Айта кетсек, биыл Келес ауданында көкөніс өнімдерін сақтауға арналған арнайы қоймалар салу жоспарлануда. Бұл жоба жеке инвесторлар есебінен жүзеге асырылады. Жаңа қоймалар шаруаларға өнімді ұзақ уақыт сақтауға мүмкіндік бермек.