ГҮЛ ЕК, ТАЛ ЕК, ТУҒАН ЖЕРДІ ТҮЛЕТ!

Арыс қаласы, Ақдала ауылдық округі, С.Ерубаев атындағы жалпы орта білім беретін мектебінің 2001 жылы бітірген түлектері Наурыз мейрамы "Игі істер" күніне орай өздері бітірген алтын ұя мектебіне 100 түп раушан гүлін отырғызды.

 

- Мақсатымыз балаларға жақсы үлгі көрсету, қоршаған ортаға ұқыпты қарауға үйретумен қатар оларды еңбекке баулу,-дейді игі істі ұйымдастырушылар.

 

Ағаш отырғызуды ежелден халқымыз игі дәстүрге айналдырған. Сондай-ақ наурызда көзі ашылған бұлақтың суы сарқылмайды, ал егілген талдың саясы мен жемісі мол болады деп сенген. Осындай сенімдерді өздеріне серік еткен осы ауылдың 1981 жылы бітірген түлектері мектеп ауласына шырша тал көшеттерін отырғызып, ағаш көшеттерін көздің қарашығындай сақтап, баптап жалғастыруды биылғы бітіруші түлектерге аманаттады.

 

Туған ауылды көркейту, көгалдандыру мақсатында жасалған игі іс-шараға атсалысқан барша азаматтарға алғысымызды білдіреміз.

 

 

Арыс қаласы әкімінің баспасөз қызметі