Пресс релиз: Ойын мекемесі, букмекерлік кеңсе немесе тотализатор жұмысының, ставкаларды қабылдаудың және өткізілетін құмар ойындардың және (немесе) бәс тігудің үлгілік қағидаларын бекіту туралы
«Қазақстан Республикасының кейбір заңнамалық актілеріне ойын бизнесі, лотерея қызметі, денсаулық сақтау, мемлекеттік еңбек инспекциясы, мемлекеттік бақылау және артық заңнамалық регламенттеуді болғызбау мәселелері бойынша өзгерістер мен толықтырулар енгізу туралы» 2024 жылғы 8 шілдедегі Заңын іске асыру мақсатында Қазақстан Республикасы Туризм және спорт министрінің м.а. 2024 жылғы 9 қазандағы № 175 бұйрығымен Ойын мекемесі, букмекерлік кеңсе, тотализатор жұмысының, мөлшерлемелер қабылдаудың және өткізілетін құмар ойындарының және (немесе) бәс тігудің үлгілік қағидалары (бұдан әрі – Үлгілік қағидалар) бекітілді.
Аталған заңға тәуелді акт «Ойын бизнесі туралы» Заңның 15-бабының 2-тармағымен көзделген ойын бизнесі субъектілерінің ішкі ережелеріне сәйкес келуі тиіс ойын мекемесі, букмекерлік кеңсе, тотализатор жұмысының үлгілік тәртібін айқындай отырып, құмар ойындары мен бәс тігулерді ұйымдастыру және өткізуге неғұрлым ашық, қауіпсіз және жауапты тәсілді қолдануды қамтамасыз етеді.
Үлгілік қағидалардың мақсаты – құмар ойындар мен бәс тігулерге қатысушылардың мүдделерін қорғау, азаматтардың құмар ойындар мен бәс тігулерге тәуелділігінің алдын алу, сондай-ақ ойын бизнесі ұйымдастырушыларының жұмыс стандарттарын жетілдіру арқылы ойын бизнесі индустриясына деген сенімді нығайту.
Осылайша, Үлгілік қағидаларда:
- казино, ойын автоматтары залы, букмекерлік кеңсе және тотализатор клиенттерін тіркеу нысанын толтыру, жеке басын куәландыратын құжаттар бойынша салыстыру және СМС-верификация арқылы сәйкестендіру жөнінде талаптар белгіленген;
- ойын бизнесі ұйымдастырушыларына қатысты 21 жасқа дейінгі, құмар ойындарға және (немесе) бәс тігуге қатысуы шектелген адамдардың тізіліміне, сондай-ақ Борышкерлердің бірыңғай тізіліміне енгізілген тұлғаларды құмар ойындарға және (немесе) бәс тігуге қатысуға тыйым салу бойынша талаптар күшейтілді;
- құмар ойындарға және (немесе) бәс тігуге қатысушыларға ұтысты төлеу мерзімдері мен тәсілдері, сондай-ақ ақшадан басқа өзге мүлік түрінде ұтыс жүлдесін беру тәртібі бекітілді. Егер бұрын ұтыстар бірнеше ай бойы төленбесе, енді олар ақша түрінде күнтізбелік үш күннен кешіктірілмей, ал мүліктік нысанда күнтізбелік бес күннен кешіктірмей (азаматтық-құқықтық сипаттағы жағдайларды қоспағанда) төленуі тиіс;
- клиенттерді құмар ойындар және (немесе) бәс тігуге қатысудың қауіп-қатерлері мен зияны туралы хабардар ету, оларға уақыт лимиттерін және мөлшерлемелерге жұмсалатын ақша сомаларына шектеулер қою мүмкіндігін беру сияқты жауапты ойын құралдарын («responsible gambling» қағидасына сәйкес) міндетті түрде қолдану бойынша талаптар белгіленді.
Үлгілік қағидалар құмар ойындарға және бәс тігуге қатысушылардың құқықтары мен заңды мүдделерін қорғауды, ойын бизнесі субъектілері ұсынатын қызметтердің сапасын арттыруды, сондай-ақ құмар ойындар мен бәс тігуге қатысудың мәдениетін жоғарылатуды қамтамасыз етеді.
Үлгілік қағидалар 2024 жылғы 11 желтоқсанда күшіне енеді.