Елімізде бұқаралық спорт пен инфрақұрылымды дамыту бойынша Мемлекет басшысының Жолдауын іске асыру шаралары

Қазіргі таңда елімізде 8,4 млн адам дене шынықтыру және спортпен жүйелі түрде айналысады. Бұл халықтың 41,4%-ын құрайды. Бұл туралы бүгін Үкімет отырысында Туризм және спорт министрі Ербол Мырзабосынов мәлімдеді.

«Мақсатымыз – 2029 жылға қарай 50%-ға жеткізу. Жыл сайын елде 25 мыңнан астам спорттық-бұқаралық іс-шара өтеді», - деп атап өтті министр.

Сондай-ақ Мемлекет басшысының тапсырмасы бойынша «Дене шынықтыру және спорт туралы» заңға түзетулер енгізілді. Олар басқару тиімділігін арттыруға және ұлттық мүддені қорғауға бағытталған.

✔️Негізгі өзгерістер:

* кәсіби клубтарды ұстауға жұмсалатын бюджетке лимит қойылды;
* Қазақстан азаматтығы жоқ спортшыларға бюджеттен қаржы бөлінбейді;
* «спорттың басым түрлері» ұғымы нақтыланып, өңірлік тізбе бекітілді.

Министрліктің басым бағыттарының бірі – спорт инфрақұрылымын дамыту. Бұл халық үшін спортты қолжетімді етеді.

✔️Спорт инфрақұрылымын дамытуда оң динамика байқалады, атап айтсақ:

* 2024 жылы 90 спорт нысаны салынды (61-ауылда,29- қалада);
* биыл 32 нысан пайдалануға берілді (27-ауылда, 5-қалада);
* жыл соңына дейін тағы 70 нысанның құрылысы аяқталады.

✔️Арнаулы мемлекеттік қор есебінен 33,2 млрд теңгеге төрт нысанның құрылысы басталды:

* Астанада Мұңайтпасов атындағы стадион;
* Алматы облысы Жалаңаш ауылында спорт кешені;
* Ақмола облысы Зеренді ауылында балалар-жасөспірімдер спорт мектебі;
* Көкшетауда көпфункционалды кешен.