Қазақстан Республикасы Туризм және спорт министрлігі жанындағы өңірлік спорт басқармаларының басшыларын тағайындау жөніндегі комиссияның кезекті отырысы өтті.
Жиында Қарағанды облысының дене шынықтыру және спорт басқармасының басшысы лауазымына ұсынылған кандидатура қаралды.
Талқылау қорытындысы бойынша комиссия мүшелері Алматы облысының олимпиадалық резерв даярлау орталығының басшысы Нұркен Нұратовтың кандидатурасын мақұлдады.
Үміткердің спорт саласындағы кәсіби тәжірибесі, басқарушылық қабілеті және өңір спортын дамытуға қатысты ұстанымы комиссия тарапынан жан-жақты зерделеніп, оң шешім қабылданды.
Кандидаттарды жергілікті атқарушы органдар ұсынады, ал тағайындау тек ҚР Туризм және спорт министрлігі жанындағы комиссияның мақұлдауынан кейін жүзеге асырылады.
27 сәуір – 1 мамыр – ауыр атлетикадан халықаралық турнир
Қазақстан құрамасынан 5 спортшы қатысады.
Өтетін орны: Апиа қ. (Самоа)
28 сәуір – 10 мамыр – үстел теннисінен командалық әлем чемпионаты
Қазақстан құрамасынан 10 спортшы қатысады.
Өтетін орны: Лондон қ. (Ұлыбритания)
30 сәуір – 3 мамыр – конкурдан Әлем кубогі кезеңі
Құрама сапынан 7 спортшы бақ сынайды.
Өтетін орны: Ташкент қ. (Өзбекстан)
30 сәуір – 3 мамыр – көркем жүзуден Әлем кубогінің 3-кезеңі
Қазақстаннан 15 спортшы қатысады.
Өтетін орны: Сиань қ. (Қытай)
30 сәуір – 3 мамыр – семсерлесуден (рапира, ерлер мен әйелдер) Әлем кубогі
Ел намысын 3 спортшы қорғайды.
Өтетін орны: Ыстамбұл қ. (Түркия)
1-3 мамыр – дзюдодан Grand Slam турнирі
Жарыста отандық 11 спортшы белдеседі.
Өтетін орны: Душанбе қ. (Тәжікстан)
1-3 мамыр – семсерлесуден (сапы, ерлер мен әйелдер) «Гран-при» турнирі
Құрама сапынан 4 спортшы қатысады.
Өтетін орны: Инчхон қ. (Оңтүстік Корея)
Қазақстанда мамыр айы мерекелер мен ұзақ демалыстардың көптігіне байланысты жыл сайын ең мазмұнды кезеңдердің бірі саналады. Бұл – ел ішінде саяхаттап, жаңа өңірлерді танып, түрлі мәдени және туристік іс-шараларға қатысуға қолайлы уақыт.
Туризм және спорт министрлігі 2026 жылға арналған мәдени-туристік іс-шаралар күнтізбесіне енген мамыр айындағы бірқатар негізгі жобалардың өтетінін хабарлайды. Биылғы күнтізбеге енген 55 ірі іс-шара ішкі туризмді дамытуға, туристік бағыттарды кеңейтуге және өңірлік брендтерді ілгерілетуге бағытталған.
Жыл басынан бері күнтізбе аясында бірқатар іс-шара жоғары деңгейде ұйымдастырылды. Олардың қатарында Burabay Ice фестивалі, қысқы дрифт кубогы, «Амал келді – жыл келді» халықаралық гастрономиялық фестивалі, Eurasian Book Fair халықаралық кітап көрмесі, сондай-ақ мыңдаған көрермен мен туристі жинаған Шымкенттегі «Дәмдәстүр» фестивалі бар.
Мамыр айындағы бағдарлама осы игі үрдісті жалғастырып, туристерге демалыстың түрлі форматтарын ұсынады. Табиғи және этномәдени фестивальдерден бастап халықаралық жарыстарға дейін. Әрбір іс-шара туралы толық ақпаратты карусельден көре аласыз.
Айта кетейік, іс-шаралар күнтізбесіндегі барлық мәлімет event.qaztourism.kz бірыңғай платформасында қолжетімді. Онда күндер, өтетін орындар мен форматтар туралы өзекті ақпарат ұсынылған. Бұл туристерге сапарларын алдын ала жоспарлап, ыңғайлы бағытты таңдауға мүмкіндік береді.
Фиджитал-атлеттер арасындағы дода Астана қаласында 29 шілде мен 9 тамыз күндері аралығында өтеді.
t.me/aqorda_resmi
Туризм және спорт министрі Ербол Мырзабосынов елордада Экономикалық ынтымақтастық ұйымының Бас хатшысы Асад Маджид Ханмен кездесті. Кездесу барысында тараптар туризм және спорт салаларындағы өңірлік ынтымақтастықты дамыту, инвестициялық байланыстарды кеңейту және бірлескен бастамаларды іске асыру мәселелерін талқылады.
Министр Қазақстанның Ұйымға мүше мемлекеттермен көпжақты өзара іс-қимылды дамытуға ерекше мән беретінін атап өтті.
«Сіздің елімізге алғашқы сапарыңыз алдағы ынтымақтастықты нығайту жолындағы маңызды қадам болады деп сенемін. Туризм мен спорт – тұрақты экономикалық өсудің, мәдениетаралық диалогтың және өңірлік интеграцияның маңызды қозғаушы күштері», – деді Ербол Мырзабосынов.
Кездесу барысында туризм саласындағы бірлескен бастамаларға ерекше назар аударылды. Атап айтқанда, 2025 жылғы қыркүйекте Ақтау қаласында өткен халықаралық туристік форумның маңызы атап өтілді. Форум аясында Ұйым кеңістігіндегі инвестициялық ынтымақтастыққа арналған сессия ұйымдастырылып, мемлекет, бизнес және халықаралық серіктестер арасында тиімді диалог орнады.
2026 жылғы 27-29 сәуір күндері Әзірбайжанның Шуша қаласында Экономикалық ынтымақтастық ұйымы Туризм министрлерінің отырысы өтеді. Қазақстан Ақтау қаласын 2030 жылға арналған Ұйымның туристік астанасы мәртебесіне ұсынды. Ақтау – Каспий теңізінің жағалауында орналасқан бірегей қала. Сондықтан мұнда жағажай, экологиялық және іскерлік туризмді дамытуға зор мүмкіндік бар.
Туризм және спорт министрі Ербол Мырзабосынов елордада Моңғолияның Мәдениет, спорт, туризм және жастар министрі Алдаржавхлан Жуковпен кездесті. Тараптар туризм және спорт салаларындағы екіжақты ынтымақтастықтың қазіргі жай-күйі мен одан әрі дамыту перспективасын талқылады.
Министр Қазақстан мен Моңғолия арасындағы серіктестіктің әлеуеті жоғары екенін атап өтіп, ұлттық спорт түрлерін дамыту және халықаралық деңгейде ілгерілету бағытындағы өзара іс-қимылдың маңызына тоқталды.
«Моңғолия ұлттық спорт түрлерімен танымал. Дәстүрлі күрес, ат жарысы және садақ ату Наадам фестивалінің ажырамас бөлігі. Моңғол спортшылары халықаралық аренада, әсіресе күрес, дзюдо және бокста жоғары нәтижелер көрсетіп келеді. Ұлттық ат спортын дамыту және насихаттау мақсатында Моңғолия аумағында халықаралық жарыстар ұйымдастыруды ұсынамыз», – деді Ербол Мырзабосынов.
Кездесу барысында білім беру саласындағы ынтымақтастық та сөз болды. Астанада ашылатын Ұлттық спорт университетінің әлеуеті таныстырылып, шетел азаматтарын жаңа университетке қабылдау басталғаны айтылды. Университет спорт ғылымы, медицина және цифрлық технологияларды біріктіретін заманауи ғылыми-білім беру орталығы болады.
Сонымен қатар туризм саласындағы әріптестік мәселелері талқыланды. Министр екі ел арасындағы туристік ағынның тұрақты өсіп келе жатқанын атап өтті. 2023-2025 жылдары Моңғолиядан Қазақстанға келушілер саны жыл сайын 40 мыңнан асып, Қазақстан азаматтарының Моңғолияға сапары да артқан.
Моңғолия Президенті Ухнаагийн Хурэлсухтың мемлекеттік сапары аясында 2026-2027 жылдарға арналған екі ел арасындағы мәдени-гуманитарлық ынтымақтастық жоспарына қол қойылғаны да атап өтілді.
«Моңғолияның туризм саласындағы әлеуетін ерекше атап өткім келеді. Туристік өнімдерді өзара ілгерілету, бірлескен жобаларды іске асыру және кадр даярлау – ортақ міндет. Қазақстан моңғол туристері мен серіктестері үшін ашық. Туризм индустриясы, меймандостық, спорт үшін кадрлар даярлау саласында Халықаралық туризм және меймандостық университеті базасында ынтымақтастық орнатуды ұсынамыз», – деді Ербол Мырзабосынов.
Кездесу қорытындысында тараптар туризм және спорт саласындағы ынтымақтастықты нығайтуға, бірлескен жобаларды іске асыруға және тәжірибе алмасуды кеңейтуге дайын екендерін растады.
Қытайдың Санья қаласында Азия жағажай ойындарында су добынан жарыс басталды. Қазақстан әйелдер құрамасы алғашқы ойында Таиланд командасын тізе бүктірді.
Біздің спортшылар келесі ойынын ертең, 23 сәуірде Ганконг құрамасына қарсы өткізеді.
Жағажайдағы су добының форматы классикалық түрінен ерекшеленеді: мұнда командалар сет бойынша ойнайды. Негізгі уақыт сеттер бойынша 2-2 есебімен аяқталып, шешуші пенальти сериясында Қазақстан құрамасы 2:0 есебімен басым түсті.
Команда құрамында өнер көрсетіп жатқан отандастарымыз: Ариадна Затыльникова, Камила Наурызбаева, Таира Мухаева, Яна Смолина, Василиса Антропова, Фатима Маткаримова және Аида Алпысбай.
Турнир айналмалы жүйесі бойынша өтеді: командалар үш ойыннан өткізеді, соның қорытындысынан кейін жүлдегерлер анықталады.
Айта кетейік, бүгін ойындардың салтанатты ашылу рәсімі де өтеді. Қазақстан құрамасының ту ұстаушылары - Мұрат Шәкенов (су добы) пен Диана Ержанова (акватлон).
ҚР Туризм және спорт министрлігі жаттықтырушы-оқытушыларға біліктілік үшін қосымша ақы алу тәртібін түсіндірді.
Үстемақы кімдерге беріледі?
✔ Біліктілікті арттыру курстарынан өткен
✔ Біліктілік тестін сәтті тапсырған
✔ Оқу-жаттығу процесін ұлттық спорттық дайындық стандарттарына сәйкес жүргізетін мамандарға.
Қамтылатын ұйымдар:
— Балалар мен жасөспірімдер спорт мектептері (БЖСМ)
— Мамандандырылған БЖСМ
— Олимпиадалық резерв мектептері
Маңызды:
Біліктілікті арттыру 5 жылда 1 рет өткізіледі.
Өтінім оқу басталғанға дейін кемінде 14 күн бұрын берілуі тиіс.
Оқу аяқталғаннан кейін:
— электрондық форматта тестілеу өткізіледі
— біліктілікті арттыру туралы куәлік беріледі
— біліктілік тестінен өткені туралы сертификат табысталады
— құжаттарды жұмыс орнына тапсыру қажет
Өтінім электронды лицензиялау порталы арқылы онлайн қабылданады.
Польшаның Крыница-Здруй қаласында шайбалы хоккейден жасөспірімдер арасында IA дивизионының әлем чемпионаты өтіп жатыр. Аталған турнирде Қазақстанның жасөспірімдер құрамасы элиталы дивизионға жолдама алу үшін сынға түсуде.
Жарыста Қазақстан құрамасымен қатар Польша, Мажарстан, Украина, Швейцария және Словения құрамалары да бақ сынап жатыр.
Әлем чемпионатында Қазақстан құрамасы әзірге үш матч өткізіп, барлығында жеңіске жетті. Қазіргі таңда Қазақстан құрамасы 9 ұпаймен турнир кестесінде көш бастап келеді.
Алғашқы турда Қазақстан құрамасы Мажарстанды 5:2 есебімен жеңсе, екінші турда Польша құрамасын 10:2 есебімен тізе бүктірді. Үшінші турда Украина құрамасына қарсы кездесуде отандық хоккейшілер камбэк жасап, жеңіске жетті. Кездесудің 25-минутына дейін Қазақстан құрамасы 0:3 есебімен ұтылып жатқан еді. Алайда Максим Худяковтың шәкірттері қарсылас қақпасына жауапсыз бес шайба соқты – 5:3.
Қазақстан құрамасы келесі кездесуін 23 сәуірде Швейцария құрамасына қарсы өткізеді. Ойын елорда уақытымен 15:30-да басталады. Ал топтық кезеңдегі соңғы матч 24 сәуірде (сағат 15:30-да) Словения құрамасына қарсы өтеді.
Айта кетейік, турнир қорытындысы бойынша бірінші орын алған команда элиталы дивизионға жолдама алады.
Туризм және спорт министрі Ербол Мырзабосынов жуырда Өзбекстан астанасы Ташкент қаласында өткен таеквондодан (WT) юниорлар арасындағы әлем чемпионатының жеңімпаздары мен жүлдегерлерімен кездесті.
Кездесу барысында министр спортшыларды жоғары жетістіктерімен құттықтап, олардың жеңісі ел мерейін үстем ететін маңызды нәтиже екенін атап өтті.
«Әлем чемпионатындағы жарқын жеңістеріңіз – барша еліміздің мақтанышы. Сіздердің табандылықтарыңыз бен қажырлы еңбектеріңіз халықаралық аренада Қазақстанның беделін арттыруға зор үлес қосты», – деді министр.
Өзбекстанда өткен таеквондодан (WT) юниорлар арасындағы әлем чемпионатында отандасымыз Айым Серікбаева әлем чемпионы атанды. Бұл нәтиже отандық спорт үшін тарихи маңызға ие. Бұған дейін еліміздің өкілі осы жас санатында соңғы рет 2006 жылы Жалғас Бекқасымов әлем чемпионы атанған болатын. Араға 20 жыл салып, бұл жетістікті Айым Серікбаева қайта жаңғыртты. Чемпионат қорытындысы бойынша Айым Серікбаева «Үздік спортшы» атағына ие болды.
Сондай-ақ юниорлар арасындағы әлем чемпионатында Ерасыл Ерзат, Ислам Медетбай, Алидар Әбдікәрімов және Әділет Шері қола жүлдегер атанып, ел қоржынына жүлде салды.
Кездесу барысында министр спортшылардың табысты өнер көрсетуінде жаттықтырушылардың еңбегі зор екенін атап өтіп, олардың кәсібилігі мен жүйелі жұмысы жоғары нәтижелерге жол ашқанын жеткізді.
«Федерация басшылығының, жаттықтырушылар құрамының кәсіби біліктілігі мен жүйелі еңбегінің арқасында осындай жоғары нәтижелерге қол жеткізіліп отыр. Сіздердің еңбектеріңіз жас ұрпаққа үлгі болары сөзсіз», – деді Ербол Мырзабосынов.
Жиын соңында Туризм және спорт министрлігі мен Қазақстан таеквондо федерациясы атынан спортшылар мен жаттықтырушылар марапатталып, оларға Құрмет грамоталары мен Алғыс хаттар табысталды.