ҚазжолҒЗИ Алматы филиалының базасында жол инженерлерінің жаңа буынын даярлайтын кафедра ашылды

«Қазақстан жол ғылыми-зерттеу институтының» АҚ (ҚазжолҒЗИ) Алматы филиалының базасында Л.Б. Гончаров атындағы Қазақ автомобиль-жол институтының (ҚазАЖИ) «Көлік құрылысы және урбанистика» кафедрасының ашылу салтанаты өтті. Жаңа білім беру форматы студенттерге ғылыми-өндірістік ортада тікелей оқуға және практикалық дайындықтан өтуге мүмкіндік береді.

Жоба ҚазжолҒЗИ мен ҚазАЖИ арасындағы практикаға бағытталған білім беруді, ғылыми қызметті дамыту және жол саласы үшін білікті инженерлік кадрларды даярлауға бағытталған ұзақмерзімді ынтымақтастық туралы меморандум аясында іске асырылды.

Кафедраның еліміздің жол саласындағы жетекші ғылыми институтының базасында тікелей ашылуы дуальды оқытуды дамытудағы маңызды қадам болды. Дайындықтың жаңа моделі білім беру процесін, ғылыми зерттеулерді және практикалық қызметті біртұтас жүйеге біріктіреді.

Студенттер тек теориялық білім алып қоймай, сонымен бірге заманауи зертханалық жабдықтармен жұмыс істей алады, жол-құрылыс материалдарын сынау әдістерін үйренеді, сондай-ақ институт мамандарының басшылығымен нақты инфрақұрылымдық жобалардың зерттеу жұмыстарына және жаңа технологияларды сынақтан өткізуге қатыса алады.

«Бүгінгі таңда салаға оқу процесінде-ақ практикалық тәжірибе жинақтап, нақты өндірістік процестерді түсінетін мамандар қажет. ҚазжолҒЗИ базасында кафедраның ашылуы жол саласының заманауи сын-қатерлеріне және жұмысқа орналасқан алғашқы күннен бастап практикалық қызметке дайын инженерлерді даярлауға мүмкіндік береді», — деп атап өтті «ҚазжолҒЗИ» АҚ Алматы филиалы директорының орынбасары Ғалия Асанова.

Мамандардың пікірінше, бұл тәсіл университет білімі мен жұмыс берушілердің талаптары арасындағы алшақтықты айтарлықтай қысқартуға мүмкіндік береді. Болашақ инженерлер оқу кезінде-ақ заманауи технологияларды меңгеріп, практикалық дағдылар мен кәсіби ортада жұмыс тәжірибесін ала алады.

Жаңа кафедра студенттерді, ғалымдарды және практик мамандарды біріктіретін автожол саласы үшін кадрлар даярлайтын толыққанды алаңға айналады деп күтілуде. Болашақта ғылым, білім және өндірістің мұндай өзара іс-қимыл моделін инженерлік кадрларды даярлаудың басқа да бағыттарына тарату мүмкіндігі қарастырылуда.