ҚР Көлік министрлігі жолаушылар тасымалының сапасына бақылауды күшейтуде

Қазақстан Республикасы Көлік министрлігінің Теміржол және су көлігі комитеті Бас көлік прокуратурасының өкілдерінің қатысуымен жолаушылар пойыздарына тексеру жүргізді.

Іс-шаралар тасымалдаушылардың жасалған шарт талаптарын сақтауын бақылау аясында ұйымдастырылды. Жаз мезгілінде сұраныстың артуы қарсаңында жолаушылар қауіпсіздігі, санитарлық жағдай және қызмет көрсету сапасына басымдық берілді.

Рейдтік іс-шаралар барысында мобильді топтар бірқатар бағыттар бойынша жолаушылар пойыздарының құрамдарын тексерді.

Тексеру кезінде вагондардың техникалық жай-күйіне, мүмкіндігі шектеулі жолаушыларға арналған арнайы купелердің болуына және олардың жабдықталуына, санитарлық жағдайға, төсек-орын жабдықтарының сапасына, сондай-ақ бейнебақылау жүйелерінің жұмыс істеуіне ерекше назар аударылды.

Тексеру қорытындысы бойынша жекелеген ескертулер анықталып, тасымалдаушыларға оларды жедел жою бойынша ұсынымдар берілді.

Көлік министрлігі бұзушылықтар анықталған жағдайда жолаушылар +7 700 098 35 35 нөмірі арқылы мессенджерлер көмегімен ахуалдық орталыққа хабарласа алатынын еске салады.

Жолаушылар тасымалының сапасын мониторингтеу жұмыстары тұрақты негізде жалғасатын болады.