Ауыл әкімдерінің диалог-платформасы аясында көлік саласының нәтижелері баяндалды

Ауыл әкімдерінің диалог-платформасы форумының екінші панельдік сессиясында Қазақстан Республикасы Көлік вице-министрі Жәнібек Тайжанов көлік саласының дамуы бойынша негізгі нәтижелерді баяндап берді.

2025 жылы елімізде рекордтық көлемде жол жөндеу жұмыстары жүргізілді — 13 мың км, оның ішінде облыстық және аудандық маңызы бар 4 мың км жол қамтылды. Нормативтік талаптарға сай жергілікті жолдардың үлесі 89%-ға жетті, жыл соңына дейін бұл көрсеткіш 91%-ға дейін өседі.

Көлік инфрақұрылымы жаңғыртылып жатыр: 1,5 мың км-ден астам жаңа теміржол жолдары салынып, заманауи қозғалысты басқару жүйелері енгізілуде. 2025 жылдың 10 айында жүк тасымалы көлемі 259,7 млн тоннаны, жолаушылар ағыны 16,4 млн адамды құрады. Жылжымалы құрамды жаңарту және 124 теміржол вокзалын модернизациялау жұмыстары басталды.

Қазақстандық әуе компаниялар 13,1 млн жолаушы тасымалдап, әуежайлар 23,9 млн адамға қызмет көрсетті. Әуежай инфрақұрылымын жаңарту және өңірлік әуе қатынасын дамыту жұмыстары жалғасуда.

Министрлік негізгі процестерді электронды форматқа көшіріп, халықаралық рейстер көлемін арттыруға және тасымал тиімділігін көтеруге мүмкіндік берді. Логистика мен бақылауды жақсартуға бағытталған цифрлық сервистер енгізілуде.

Сессия барысында Ақжал, Көкентау, Ақирек ауылдық округтері мен Жаңғызтөбе станциясының әкімдері жергілікті жолдардың күтімі, Семей–Қайнар жолының алғашқы 74 км бөлігіне жөндеу, «Батыс Еуропа — Батыс Қытай» және «Омбы — Майқапшағай» трассалары бойына қоршау орнату, жергілікті жолдарды жөндеуге бюджет қаражатын бөлу, сондай-ақ Жаңғызтөбе станциясында жаяу жүргіншілер көпірін салу мәселелерін көтерді. Барлық сұрақтар бойынша түсініктеме беріліп, өтініштер бақылауға алынды.

Қорытындылай келе, вице-министр инфрақұрылымды дамыту және еліміздің транзиттік әлеуетін арттыру мақсатында жүйелі жұмыстар жалғасатынын атап өтті.