70 мың қонақ, рекорд және дрон-шоу: Balkhash Tour Fest – 2026 қалай өтті

Balkhash Tour Fest – 2026 фестиваліне шамамен 70 мың адам қатысып, биылғы жазғы маусымдағы ең ауқымды туристік іс-шаралардың біріне айналды. Бірнеше күнге созылған фестиваль аясында мәдени, спорттық және ойын-сауық бағытындағы 20-ға жуық іс-шара ұйымдастырылды. Бағдарламада жарыстар, концерттер, би батлдары, Халықаралық волонтерлер форумы, сондай-ақ спорттық және гастрономиялық туризм элементтері қамтылды.

Іс-шара Қазақстан Республикасы Туризм және спорт министрлігі бекіткен 2026 жылғы туристік күнтізбе аясында өтті және елдегі оқиғалық туризмді дамытуға бағытталды.

Фестивальдің басты жаңалықтарының бірі – Балқаш көлінде алғаш рет ұйымдастырылған өңірлік Pikeman жаппай жүзу жарысы болды. Ұйымдастырушылар бұл бастаманың алдағы уақытта өңірдің жаңа туристік брендіне айналуы мүмкін екенін атап өтті.

Гастрономиялық бөлім де ерекше назар аудартты. Фестиваль барысында салмағы 86,4 келі болатын қазыбургер дайындалып, ресми түрде Қазақстан рекордтар кітабына енгізілді. Кейін рекордтық тағам қайырымдылық мақсатында қаладағы әлеуметтік ұйымдарға берілді.

Кештің ең әсерлі сәттерінің бірі – 500 дрон қатысқан жарық шоуы болды. Мұндай форматтағы көрініс Қарағанды облысында алғаш рет өткізілді. Сонымен қатар жағалауда Балқаштың жаңа туристік символдарының біріне айналуы көзделген жолбарыс мүсіні таныстырылды.

Фестиваль Балқаштың Қазақстандағы ішкі және келу туризмді дамытуға әлеуеті жоғары бағыт екенін тағы бір мәрте дәлелдеді.