Өскеменде «Mongol Rally» халықаралық автошеруінің негізгі мәресі өтті

2025 жылғы 23 тамыз күні Өскемен қаласында әйгілі халықаралық автошеру «Mongol Rally»-дің негізгі мәресі өтті. Шара дәстүр бойынша Достық үйінде (ДКМ) ұйымдастырылды.

Биылғы жылы Шығыс Қазақстанға әлемнің әртүрлі елдерінен 100-ден астам автокөлік пен 300-ден аса қатысушы келді. Қатысушылар мен қонақтар түрлі мәдениет пен ұлт өкілдерін біріктіретін раллидің ерекше атмосферасын сезіне алды.

Шығыс Қазақстан облысының әкімі қатысушылар мен көрермендерге арнап құттықтау сөз сөйледі:

«Сіздерді Өскеменде қарсы алу – біз үшін үлкен мәртебе. Сіздердің жолдарыңыз – жаңа белестердің, еңсерілген қиындықтар мен зерттелмеген бағыттардың үлгісі. Сіздер жоғары төзімділікті, шеберлікті және табандылықты көрсеттіңіздер. Сіздердің келулеріңіз – өлкеміздің байлығы мен сұлулығын, оның мәдени мұрасын, табиғи ресурстарын және халқымыздың қонақжайлығын әлемге танытудың мүмкіндігі.».

Өскемендегі «Mongol Rally» мәресі өңірдің мәдени және туристік өміріндегі айшықты оқиғаға айналып, оның халықаралық аренадағы рөлін тағы бір мәрте айқындады.