Тұрақты комиссиялардың отырысы: мектептер дайындығынан абаттандыруға дейін
А.В. Кашиннің төрағалығымен аудандық мәслихаттың тұрақты комиссияларының кезекті бірлескен отырысы өтті. Күн тәртібінде ауылдық округтердің тіршілік әрекеті мен ауданның әлеуметтік саласы үшін тікелей маңызы бар мәселелер қаралды.
Отырыс барысында депутаттар Дмитриев ауылдық округінің әкімі Д.Қ. Исенкеневтің өзіне жүктелген функциялар мен міндеттердің орындалуы туралы есебін тыңдады. Депутаттар оның жұмыс нәтижелерін атап өте келе, округ басшысының өз міндеттеріне жауапкершілікпен қарайтынын, туындаған мәселелерді терең түсініп, тұрғындарды мазалаған түйткілдерді жедел шешуге тырысатынын баса айтты. Оған алдағы жұмысына табыс пен ауылдық округтің игілігі үшін жаңа жетістіктерге жете беруіне тілектер білдірілді.
Есепті қарау қорытындысы бойынша депутаттар аудандық мәслихаттың кезекті сессиясының бекітуіне тиісті шешімді енгізді.
Отырыс барысында білім беру мекемелерінің жаңа оқу жылына дайындығына ерекше назар аударылды. Депутаттық бақылау шеңберінде аудандық білім беру бөлімінің басшысы А.А. Теміров тұрақты комиссия мүшелерін атқарылған жұмыстар туралы хабардар етті.
Атап өтілгендей, ауданның барлық білім беру ұйымдарында ағымдағы жөндеу жұмыстары жүргізілді. Сонымен қатар Хмельницкий мектебінде күрделі жөндеу жоспарланған – екі қабаттың терезелері ауыстырылмақ. Бұл мақсаттарға 30 млн теңге қарастырылған.
Білім беру мекемелерін 2026-2027 жылдардағы жылыту маусымына дайындау да маңызды бағыт болып қала береді. 20 тамызға дейін мектептер мен басқа да білім беру ұйымдарында жылыту жүйелерін дайындау бойынша қажетті жұмыстар, соның ішінде жылыту жүйелерін нығыздау және жуу жұмыстары аяқталуы тиіс.
Депутаттар жаңа оқу жылына дайындық мәселелерін тек отырыс аясында ғана қарап қойған жоқ. Алдын ала жүргізілген жұмыстар барысында тұрақты комиссия мүшелері ауылдық округтерді аралап, мектептер мен олардың жанындағы шағын орталықтарда, денсаулық сақтау мекемелерінде және басқа да әлеуметтік сала нысандарында болды. Мұндай шығулар жағдайды тікелей жергілікті жерде бағалауға және бірінші кезекте шешуді талап ететін мәселелерді анықтауға мүмкіндік береді.
Нысандарды аралау қорытындысы бойынша білім беру мекемелері үшін ортақ проблемалардың бірі ретінде от жағушылардың жетіспеушілігі қалып отырғаны атап өтілді. Бұдан бөлек, кейбір мектептердің қазандықтарында шатырды жөндеу қажет.
Әлеуметтік нысандарды жылыту маусымына дайындау мәселесі аудан әкімінің жедел мәселелер, тұрғын үй-коммуналдық шаруашылық, жолаушылар көлігі, автомобиль жолдары және құрылыс жөніндегі орынбасары Қ.С. Иманжановтың қатысуымен де қаралды. Ол өз сөзінде жалпы аудан бойынша жылыту маусымына дайындық жағдайы тұрақты екенін, сонымен қатар бұл бағыттағы жұмыстар жалғасып жатқанын атап өтті.
Қ.С. Иманжанов баяндамасының тағы бір тақырыбы Тимирязев ауданының елді мекендерін абаттандыру мәселесі болды. Елді мекендерде тазалық орнату, сондай-ақ олардың санитарлық және эстетикалық жай-күйін жақсарту бойынша кешенді жұмыстар жүргізіліп жатқанын айтты.
Атқарылған іс-шаралардың қатарында аумақтарды тазарту, қоқыс пен қиды жинау және қоқыс үйінділеріне шығару, арамшөптерді шабу, гүлзарлар салу, ағаштар, бұталар мен гүлдер отырғызу жұмыстары бар. Сондай-ақ ғимараттардың қасбеттерін, қоршауларды және басқа да нысандарды тиісті қалыпқа келтіру бойынша жұмыстар жүргізілуде.
Осылайша, халықтың өмір сүру сапасына тікелей әсер ететін мәселелер депутаттардың назарында қалып отыр. Мектептерді жаңа оқу жылына дайындау, әлеуметтік нысандардың жылыту маусымына әзірлігін қамтамасыз ету және елді мекендерді абаттандыру барлық мүдделі қызметтердің жүйелі әрі үйлесімді жұмысын талап етеді. Депутаттық бақылау мен жергілікті жерлерге шығу бар проблемаларды көріп қана қоймай, оларды шешудің нақты жолдарын анықтауға мүмкіндік береді.