Сайлаушылар алдындағы есеп

Аудандық мәслихат депутаттары ашықтық пен есеп берушілік қағидаттарына адалдығын растай отырып, халықпен есеп беру кездесулерін жалғастыруда. Іс-шаралар сайлау округтерінде өтіп, тұрғындарға өз сұрақтарын тікелей қойып, атқарылған жұмыстар туралы ақпарат алуға мүмкіндік береді.

Қазақстан Республикасының қолданыстағы заңнамасына сәйкес, депутаттар жылына кемінде бір рет өз қызметі туралы сайлаушылар алдында есеп беруге міндетті. Мұндай кездесулер өзекті мәселелерді талқылауға және сындарлы диалог орнатуға тиімді алаңға айналуда.

№7 сайлау округінің депутаты, аудандық мәслихат төрағасы А.С. Асанованың кезекті есеп беру кездесуі «AMANAT» партиясының аудандық филиалында өтті. Өз сөзінде ол мәслихаттың қызметі, тұрақты комиссиялардың жұмысы және қабылданған шешімдердің жүзеге асырылуы туралы жан-жақты баяндады. Сондай-ақ тұрғын үй-коммуналдық шаруашылық, мектептерді жөндеу, сумен қамту, жол инфрақұрылымының сапасы және қаңғыбас жануарлар санын реттеу мәселелерін шешуге бағытталған депутаттық сауалдар туралы ақпарат берілді.

Кездесу барысында тұрғындар белсенділік танытып, абаттандыру, жолдардың жағдайы, медициналық қызметтердің қолжетімділігі және басқа да әлеуметтік маңызы бар бағыттар бойынша сұрақтар қойды.

Кездесу соңында А.С. Асанова тұрғындарға белсенді қатысқандары үшін алғыс білдіріп, түскен барлық өтініштер бақылауға алынып, атқарушы мемлекеттік органдармен бірлесіп қаралатынын атап өтті. Ол халықпен ашық диалог жүргізу өзекті мәселелерді шешудің және аудан тұрғындарының өмір сапасын арттырудың маңызды құралы болып қала беретінін айтты.

Осындай есеп беру кездесулері алдағы уақытта да жалғасып, депутаттық корпус қызметінің ашықтығын қамтамасыз етіп, билік пен қоғам арасындағы сенімді нығайта түседі.