СҚО-ға Қытай Халық Республикасының Елшісі ресми сапармен келді
Солтүстік Қазақстан облысына Қытай Халық Республикасының Қазақстан Республикасындағы Төтенше және Өкілетті Елшісі Хань Чуньлин бастаған делегация ресми жұмыс сапарымен келді.
Сапар барысында өңір басшысы Ғауез Нұрмұхамбетов ҚХР делегациясымен кездесіп, СҚО-ның инвестициялық және экспорттық әлеуеті, ауыл шаруашылығы саласындағы бірлескен жобалар мен өңіраралық серіктестікті дамыту мәселелерін талқылады.
«Қытай – Қазақстанның маңызды стратегиялық серіктесі. Мемлекет басшысы атап өткендей, екі ел арасындағы қарым-қатынас жаңа “алтын кезеңге” қадам басты. Солтүстік Қазақстан облысы осы өзара тиімді әріптестікті одан әрі дамытуға мүдделі», – деді Ғауез Нұрмұхамбетов.
2025 жылдың алғашқы жартыжылдығында облыс пен ҚХР арасындағы тауар айналымы 76 млн АҚШ долларын құрап, өткен жылмен салыстырғанда өскен. Экспорттың негізгі бөлігін дәнді және майлы дақылдар құрайды. Сонымен қатар, өңірде құрама жем өндірісін дамыту бағытында жобалар іске асырылып жатыр.
Инвестициялық инфрақұрылымды дамыту мақсатында «Qyzyljar» арнайы экономикалық аймағында және оның субаймақтарында бірқатар жобалар жүзеге асуда. Тайынша ауданында қытайлық «Айцзю» корпорациясы майлы дақылдарды өңдеу, құрама жем шығару және диірмен кешенін дамыту бағытында табысты жұмыс жүргізуде. Сонымен бірге, агроөнеркәсіптік парк құру жоспарланған.
2025 жылғы мамырда Қазақстан мен Қытай арасында құс етін экспорттауға қатысты қол қойылған хаттама жаңа мүмкіндіктерге жол ашты. Экспортқа алғашқы дайын кәсіпорындардың бірі – «Северный бройлер» құс фабрикасы.
Білім беру саласында да ынтымақтастық дамып келеді. М. Қозыбаев атындағы СҚУ Қытайдың жетекші жоғары оқу орындарымен, оның ішінде Солтүстік-Батыс ауыл және орман шаруашылығы университетімен тығыз байланыс орнатқан.
«Солтүстік Қазақстан облысы Қытай Халық Республикасымен экономикалық, инвестициялық және гуманитарлық байланыстарды одан әрі нығайтуға мүдделі. Біз өңірімізде екі елдің жетекші бизнес өкілдерінің қатысуымен халықаралық бизнес-форум өткізу мүмкіндігін қарастырудамыз. Мұндай алаң іскерлік байланыстарды кеңейтуге, өзара тиімді жобаларды ілгерілетуге және өңіраралық серіктестікті тереңдетуге ықпал етеді деп сенемін», деді облыс әкімі.