Қорғандық шаруалар СҚО-дағы сүтті мал шаруашылығының тәжірибесін зерделеуде

Бүгін Солтүстік Қазақстан облысына губернатордың орынбасары Сергей Гаврин бастаған Қорған облысының делегациясы келді. Оның құрамында шекаралас өңірдің агроқұрылымдарының басшылары бар. Сапар ресейлік тараптың бастамасымен ұйымдастырылып, СҚО делегациясының Қорған облысына жасаған ресми сапары аясында басталған өзара байланыстардың жалғасы болды.

Қорғандық тарап біздің өңірде сүт фермаларын салу және осы жобаны республика көлемінде тарату бойынша бастамаларға ерекше қызығушылық танытты. Сапар барысында қонақтар Солтүстік Қазақстан облысында агроөнеркәсіптік кешенде инвестициялық жобаларды қаржыландыру мен іске асырудың үздік тәжірибелерімен танысты.

Бағдарлама аясында делегация Аққайың ауданындағы заманауи «Қызылжар сүт» және «Иван Зенченко» сүт-тауарлы фермаларында болды. Сонымен қатар, Новоникольское ауылына барып, онда «Зенченко и К» КС-де ауыл шаруашылығының дамуы мен әлеуметтік инфрақұрылыммен танысты. Сапар соңында Мамлют ауданының «Арқалық» шаруа қожалығына барып, онда биенің сүтін өңдеу бойынша бірегей жобамен танысты.

Бұл сапар агроөнеркәсіп саласындағы өңіраралық ынтымақтастықты дамытуға, инвестициялық жобаларды іске асыру бойынша тәжірибе алмасуға, сондай-ақ екі көршілес өңір кәсіпорындарының арасында әріптестік байланыс орнатуға бағытталды.