Бүгін «Тұқым-2026. Қызылжар» халықаралық конференциясы отандық және көршілес елдердің сарапшыларын біріктірді. Конференцияға СҚО әкімі Ғауез Нұрмұхамбетов қатысты. Қатысушылар қазақстандық және шетелдік өндірушілер ұсынған жоғары маржиналды дақылдардың тұқымдары көрмесімен танысты.
«Тұқым шаруашылығын дамыту мемлекеттік аграрлық саясаттың негізгі бағыттарының бірі. Өңірде екінші жыл қатарынан өтіп отырған «Тұқым- 2026 Қызылжар» халықаралық конференциясы отандық және шетелдік жетекші сарапшыларды біріктірген маңызды алаңға айналды. Биылғы жылы шараға бес елдің өкілдері қатысып отыр. Бұл көрме-конференцияның өтуі Президент айқындаған мемлекеттік басымдықтардың жүзеге асырылып жатқаны мен жаңартылған Конституция талаптарына сай келуінің айғағы»,- деп атап өтті өңір басшысы.
Алынатын өнімнің негізі тұқымдарды таңдау және қайта өндіру кезеңінде қалыптасады. Өткен жылы облыс аграршылары 6 млн тоннадан астам дәнді дақылдар және 1,3 млн тонна майлы дақылдар жинап, ел бойынша үздік көрсеткішке жетті. Бұл нәтижеге облыстағы 43 тұқым шаруашылығының елеулі үлесі бар, олар жергілікті жағдайға бейімделген шамамен 95 мың тонна тұқым өндірді. Облыстық ауыл шаруашылығы тәжірибелік станциясы жыл сайын 8 мыңнан астам бидай үлгілерін сынақтан өткізеді. Өткен жылы 12,1 мың тонна түпнұсқа және элиталық тұқым өндірілді.
Жетістіктердің барлығы мемлекеттік қолдау, заманауи агротехнологияларды енгізу және ғылыми әлеуетті дамыту арқасында мүмкін болып отыр. Кешенді жұмыс агроөндірістік кешеннің тұрақты дамуына және ауыл шаруашылығының бәсекеге қабілеттілігін арттыруға сенімді негіз қалыптастырады.
Стамбул қаласында (Түркия) өткен ART-фестивалінде жергілікті ұжым 1 Супер Гран-при, 2 Гран-при және 1 бірінші орынды қанжығасына байлады. Облыс әкімі ұжымды тамаша өнер көрсетуімен құттықтады.
« «Sensitive» би театры халықаралық сахнада өңіріміздің намысын абыроймен қорғап шықты. Бұл жеңіс бишілермен ұжым жетекшісі Ольга Ростовщикованың қажырлы еңбегінің нәтижесі. Алдағы уақытта ұжымға жаңа шығармашылық идеялар мен үлкен жетістіктер тілеймін!»,- деп жазды өңір басшысы әлеуметтік парақшасында.
Бүгін облыс әкімі Ғауез Нұрмұхамбетовтің төрағалығымен өңір активінің қатысуымен Қазақстан Республикасының Жаңа Конституциясының жобасы талқыланды.
Мемлекет басшысының тапсырмасымен парламенттік реформаны жүргізу бойынша жұмыс тобы құрылған болатын. Оның құрамына жетекші сарапшылар, саяси партиялар мен қоғамдық ұйымдардың өкілдері кірді. Олардың ішінде біздің жерлестеріміз Парламент Сенаты Төрағасының орынбасары Ольга Перепечина, облыстық мәслихаттың төрағасы Владимир Бубенко, Қоғамдық кеңестің төрағасы Ерлан Тоқшылық бар.
«Құжаттың негізгі назарында азаматтардың құқықтары мен бостандықтарын қорғау, заң үстемдігін нығайту және мемлекеттік басқарудың тиімділігін арттыру мәселелері бар. Бір палаталы Парламентке көшу заң шығару процесін айқын, жедел және тиімді етуге мүмкіндік бермек. Сонымен қатар, мәдениет, ғылым және инновацияларды дамытуға ерекше мән берілген, олар адам капиталын қалыптастырудың және елдің тұрақты дамуының стратегиялық негізі ретінде қарастырылады»,- деді өңір басшысы.
Одан бөлек, алдағы жалпыхалықтық референдум әрбір азаматқа Конституцияның негізгі заңын қалыптастыруға тікелей қатысуға және Қазақстанның болашағын айқындауға мүмкіндік беретінін атап өтті. Жаңартылған Конституцияны қабылдау мемлекетті жаңғырту, билік институттарына деген сенімді нығайту және барлық қазақстандықтар үшін тұрақты әрі әділ болашақ қамтамасыз етудің маңызды қадамы болмақ.
Ералы Тоғжанов бастаған топ Мемлекет басшысының халықты сапалы ауыз сумен қамтамасыз ету жөніндегі тапсырмасының орындалу барысын тексерді.
✔️ Президенттің халықты ауыз сумен 100 % қамтамасыз ету жөніндегі тапсырмасын орындау мақсатында облыста кешенді жұмыс жүргізілуде. Ауылдарла жаңа сумен жабдықтау нысандарын салу, қолданыстағы инфрақұрылымды жаңғырту жұмыстары атқарылды.
✔️ Үкіметтің қолдауымен өткен жылы сумен жабдықтау саласын дамытуға барлық қаржыландыру көздерінен 74 млрд теңгеден астам қаражат бөлінді. Жұмыстар 140 ауылда жүргізіліп, оның ішінде 88-і алғаш рет ауыз сумен қамтамасыз етілді, ал қалған елді мекендерде сумен жабдықтау қызметінің сапасы жақсартылды.
✔️ Жаңа нысандар салумен қатар, өңірде қолданыстағы сумен жабдықтау жүйелерін жақсарту және жаңғырту бойынша жоспарлы жұмыстар жүргізілуде. 2025 жылы осы бағытта 34 жобаны іске асыру басталып, оның 13-і аяқталды. Ағымдағы жылы қолданыстағы сумен жабдықтау нысандарын жаңғыртуға бағытталған тағы 17 жобаны жүзеге асыру көзделген.
Облыс әкімі Ғауез Нұрмұхамбетов тұрғындарды жеке қабылдап, олардың көкейкесті сауалдарын тыңдады.
Кездесу барысында еңбек қатынастары, ескерткіш мемориалдар орнату, сондай-ақ жер мәселелері көтерілді.
Әрбір өтініш бойынша жауапты мемлекеттік органдарға нақты тапсырмалар беріліп, олардың орындалуы қатаң бақылауға алынды.
Петропавл қаласында «Эко-Батл: Таза Қазақстан» зияткерлік ойыны өтті. Іс-шараны Қоғамдық даму және ақпарат орталығының жастар бастамалары бөлімі «Birgemiz» еріктілер фронт-офисінің қолдауымен ұйымдастырды. Қалалық колледждердің студенттері қатысып, командаларға бірігіп, интерактивті форматта экология, тазалық және қоршаған орта алдындағы жеке жауапкершілік тақырыптарын талқылады.
«Зияткерлік ойындар өткізу идеясы жастардың экологиялық сауаттылығын арттыруға бағытталған бастамамыздың бір бөлігі ретінде пайда болды. Біздің мақсатымыз - студенттерді тек оқыту ғана емес, сонымен бірге сыни ойлау мен командалық жұмысты дамыту. Сондықтан қалдықтарды сұрыптау және биоалуантүрлілікті сақтау сияқты өзекті экологиялық мәселелерді талқылауға ойын тамаша алаң болады деп шештік. Қатысушылар алған білімдерін күнделікті өмірде қолданады деп үміттенеміз», - деді іс-шара ұйымдастырушысы, «Birgemiz» еріктілер фронт-офисінің үйлестірушісі Гүлбақыт Байбусинова.
«Эко-Батл» бағдарламасы екі кезеңнен тұрды. Бірінші кезеңде командалар экология және тазалық тақырыбы бойынша сұрақтарға жауап беріп, қалдықтарды кәдеге жаратуға қатысты нақты деректер мен нормалар бойынша білімдерін көрсетті. Екінші кезеңде қатысушылар командалық өзара әрекетке бағытталған тапсырманы орындады: капитандар тақырыптық сөздер мен ұғымдарды атамай түсіндіріп, ал команда тез бағдарланып, дұрыс жауап беруге тиіс болды.
Өңірде мұндай экологиялық интерактивтер жақсы дәстүрге айналып келеді. Соңғы жылдары «Таза Қазақстан» аясында жастарға арналған іс-шаралар саны артып, қатысушыларды тарту, диалог орнату және тәжірибелік қатысуға басымдық берілуде. Мұндай формат экология туралы қарапайым тілде айтуға және білімді нақты әдеттерге айналдыруға мүмкіндік береді.
Қатысушылардың айтуынша, ойын күнделікті әрекеттерге және олардың қоршаған ортаға әсеріне жаңаша қарауға көмектескен.
«Ойын өте жарқын және жағымды әсер қалдырды. Эко-Батл форматы қызықты ғана емес, сонымен қатар танымдық болып шықты - мен экология туралы көп нәрсе білдім және қоршаған ортаны сақтау үшін тіпті кішігірім әрекеттердің қаншалықты маңызды екенін түсіндім. Бәрінен бұрын біз командаларда жұмыс істегеніміз, экологиялық мәселелерді талқылағанымыз және бірге шешім іздегеніміз ұнады. Бұл жауапкершілікті сезінуге және әркімнің үлесі шынымен маңызды екенін түсінуге көмектесті», - деп атап өтті ойынға қатысушылардың бірі Ілияс Ташев.
Өз әсерімен Мағжан Жұмабаев атындағы колледждің студенті Анастасия да бөлісті. Оның айтуынша, бұл қатысу тек қызықты уақыт өткізу ғана емес, маңызды іске үлес қосып, қаладағы экологиялық жағдайды жақсартуға қатысты нақты ұсыныстарды талқылауға мүмкіндік берген.
«Мені бір сағаттың ішінде қаншалықты пайдалы әрі қызықты ақпарат алуға болатыны шын мәнінде таңқалдырды. Ойын барысында біз тек жарысып қана қоймай, идеяларды белсенді талқылап, пікір алмастық және қаламыздағы экологиялық ахуалды жақсартудың жолдарын ұсындық. Әрбір ту тек белгілі бір елді ғана емес, сонымен бірге маңызды экологиялық бастамалар мен тақырыптарды да көрсетіп, ойынға күтпеген әрі қосымша қызығушылық элементін қосты. Нәтижесінде бұл мен үшін жай ғана қызықты іс емес, маңызды әрі қажет іске өз үлесімді қосудың нақты мүмкіндігі болды. Экология мен үшін өте маңызды, кез келген өзгеріс өзімізден - шағын, бірақ саналы қадамдардан басталады деп сенемін».
Ұйымдастырушылардың айтуынша, іс-шараның мақсаты - жастар арасында экологиялық мәдениетті қалыптастыру, қоршаған ортаға ұқыпты қарауды тәрбиелеу, сондай-ақ командалық жұмыс пен белсенді қатысу арқылы тазалық пен тәртіпке саналы көзқарасты бекіту.
#ТазаҚазақстан #тұрақтыдаму #тазажер #экология #TazaChallenge @TazaQazaqstan
ҚР Ішкі істер министрінің бұйрығымен полиция полковнигі Абай Қуатбаевич Жүсіпов Солтүстік Қазақстан облысы Полиция департаментінің бастығы болып тағайындалды.
Абай Қуатбаевич 1978 жылы туған, Қызылорда облысының тумасы.
2000 жылы М. Х. Дулати атындағы Тараз мемлекеттік университетін, 2002 жылы М. С. Нарикбаев атындағы Қазақ гуманитарлық-заң университетін, ал 2024 жылы Ресей Федерациясы Ішкі істер министрлігінің Басқару академиясын «құқықтану», «экономика», «персоналды басқару» мамандықтары бойынша тәмамдаған.
Бүгін облыс әкімі Ғауез Нұрмұхамбетов Петропавл 2-ЖЭО жүргізіліп жатқан жұмыстардың барысын тексерді.
Қазіргі уақытта станцияда 10 қазандық пен 7 турбоагрегат жұмыс істеп тұр. Қалада жылыту маусымы 3 түтін мұржасымен басталған болатын. Жұмыстар штаттық режимде жүргізілуде, жылумен қамтамасыз ету көрсеткіштері белгіленген талаптарға сай.
«2025 жылы облыс көлемінде 12,6 шақырым жылу желісі, 1 520 шақырым электрмен жабдықтау желісі қайта жаңғыртылып, 227 қосалқы станциясына реконструкция жүргізілді. Бұның барлығы жылыту маусымының тұрақты өтуін қамтамасыз етуге мүмкіндік беріп отыр»,- деді өңір басшысы.
Жалпы облыс бойынша 484 қазандық жұмыс істейді. 562 мың тонна көмір қоры дайындалды. Жылыту маусымының өту барысы ерекше бақылауда.
Жерлесіміз Польшада өтіп жатқан Әлем кубогы кезеңінде жоғары нәтиже көрсетті. 12,5 шақырымдық жеке жарыста мәреге үшінші болып келіп, қола жүлдеге ие болды.
Бұған дейін Ербол Хамитов Германияда өткен Әлем кубогы кезеңінде де сәтті өнер көрсеткен болатын. 7,5 шақырымдық жарыста (LW 12 санаты) қола медаль жеңіп алса, 0,9 шақырымдық спринтте күміс жүлдеге қол жеткізді.
Есіл ауданының Николаевка, Корнеевка және Покровка ауылдарында заманауи IT-орталықтар өз жұмысын бастады. Жаңа орталықтар шамамен 11 мың тұрғынды, оның ішінде 2,5 мыңға жуық жасты қамтымақ.
IT-орталықтар заманауи компьютерлермен және жоғары жылдамдықтағы интернетпен жабдықталған. Мұнда бағдарламалау, робототехника және цифрлық сауаттылық бағыттары бойынша сабақтар өтеді. Жоба ауылдық жерлерде цифрлық дағдыларды дамытуға және жастарды қолдауға бағытталған.