Премьер-министрдің бірінші орынбасары Роман Скляр мен СҚО әкімі Ғауез Нұрмұхамбетов қайықпен Ойқала ықшам ауданындағы су тасқынының ауқымын бағалады. Қазір шағын ауданның негізгі бөлігі суда тұр.
"Екі күн бұрын Есіл өзеніндегі су деңгейі төмендей бастады. Су кеткенде, Ойқала жабық «қазанның» күйін кешеді. Сондықтан бөгеттер арқылы су айдау үшін мотопомпаларды, сорғыларды және су айдау жабдықтарын барынша тарту қажет болады. Петропавл қаласының әкіміне бұл жұмысты қысқа мерзімде ұйымдастыруды тапсырдым", - деп жазды облыс әкімі әлеуметтік желіде.
СҚО әкімі Ғауез Нұрмұхамбетов үлкен судың ортасында қалған Прибрежное ауылының тұрғындарымен кездесті. Өңір басшысы қиын сәтте ауылдықтарға қолдау көрсетуді жөн көріп, су тасқынынан зардап шеккендерге мемлекет тарапынан барынша көмек көрсетілетіні туралы айтты.
Азаматтар өздерін толғандырған сұрақтарын қойды, оларға барынша жауап берілді. Ауылда әкімдік тұрғындардан келтірілген шығынды өтеу туралы өтініштерді қабылдауды бастайды. Ол үшін эвакуациялау пунктінде Старлинк спутниктік интернеті орнатылды.
Су тасқынының алғашқы күндері тұрғындардың бір бөлігі ауылдан тікұшақпен көшірілді.
"Ауыл изоляцияда болғандықтан, халықты қажетті азық-түлік және дәрі-дәрмекпен қамтамасыз ету қажет. Қызылжар ауданының әкіміне тұрғындарды қажетті заттармен қамтамасыз етуді және олардың өтініштеріне жедел ден қоюды тапсырдым", - деп жазды өңір басшысы әлеуметтік желіде.