Солтүстік Қазақстан облысының әкімі Ғауез Нұрмұхамбетов өңір тұрғындарын жеке мәселелері бойынша қабылдады. Қабылдауға қоныс аудару бағдарламасына қатысушы да жеке өтінішімен келді. Сондай-ақ тұрғындар баспанамен қамтамасыз ету және жол инфрақұрылымының жай-күйіне қатысты мәселелерді көтерді. Әрбір өтініш бойынша тиісті түсініктемелер беріліп, көтерілген мәселелерді шешу жөніндегі нақты шаралар айқындалды.
Қабылдау қорытындысы бойынша өңір басшысы жауапты мемлекеттік органдарға нақты тапсырмалар берді. Тұрғындар көтерген мәселелердің орындалуы бақылауға алынды.
Ғабит Мүсірепов атындағы ауданда коммуналдық инфрақұрылымды алдағы жылыту маусымына дайындауға ерекше көңіл бөлінуде. Төрт жыл бойы жұмыс істемеген Новоишим қазандығы қайта іске қосылды. Жылу желілерінің жалпы ұзындығы 11,6 шақырымды құрайды.
Қазіргі таңда орталықтандырылған жылумен жабдықтау жүйесіне жалпы аумағы шамамен 60 мың шаршы метр болатын 60-қа жуық нысан қосылған.
Өңір басшысы Ғауез Нұрмұхамбетов жұмыс сапарымен Ғабит Мүсірепов атындағы ауданға барып, егін жинау науқанының барысымен, ауыл шаруашылығы кәсіпорындарының жұмысымен және дала жұмыстарының нәтижелерімен танысты.
Биыл аудандағы егіс алқабы 722,4 мың гектарды құрайды. Оның 503 мың гектарына дәнді және дәнді-бұршақты, 169,7 мың гектарына майлы дақылдар егілген. Бүгінгі таңда 363,7 мың гектар алқаптағы дәнді және дәнді-бұршақты дақылдар жиналды. Орташа өнімділік гектарына 16,8 центнерді құрап отыр.
Аудан шаруашылықтары техника паркін белсенді жаңартып, заманауи технологияларды өндіріске енгізуде. Мемлекеттік қолдау шараларының арқасында биыл шамамен 10 млрд теңгеге 100-ден астам жоғары өнімді ауыл шаруашылығы техникасы сатып алынды. Дала жұмыстарында жасанды интеллект негізіндегі технологиялар да қолданылуда. Бұл өндірістік үдерістердің дәлдігін арттырып, егін жинау кезіндегі өнім шығынын азайтуға мүмкіндік береді.
Ауданда жалпы сыйымдылығы шамамен 1,4 млн тоннаны құрайтын 25 элеватор жұмыс істейді. Бүгінде жаңа өнімнің 500 мың тоннаға жуығы сақтауға қабылданды.
Өсімдік шаруашылығымен қатар, мал шаруашылығы да қарқынды дамып келеді. «Неженка Ерке» ЖШС 900 басқа арналған жаңа ферманы пайдалануға берді.
Айыртау ауданының Саумалкөл ауылында алты жыл бойы жұмыс істемеген қазандық қайта іске қосылды. Биыл нысанда қажетті жұмыстар толық аяқталып, алдағы жылыту маусымына дайындалды.
Қазандық шамамен 35 мың шаршы метр аумақты жылумен қамтамасыз етеді. Нәтижесінде 635 пәтер мен 10 әлеуметтік нысан тұрақты жылумен қамтылады.
Облыс әкімі Ғауез Нұрмұхамбетов жұмыс сапарымен Айыртау ауданына барып, егін жинау науқанының барысымен танысты. Өңір басшысы бірқатар ауыл шаруашылығы кәсіпорындарын аралап, диқандармен кездесіп, биылғы өнім мен науқанның өту барысын талқылады.
Бүгінде ауданда егін алқаптарының 82%-ы жиналды. Орташа өнімділік гектарына 17,2 центнерді құраса, жекелеген шаруашылықтарда 30 центнерге дейін жетіп отыр. Ауданның жалпы егіс алқабы 361,3 мың гектарды құрайды және облыстағы ең ірі егіс алқаптарының бірі саналады.
Мемлекеттік қолдау шараларының арқасында шаруалар егін жинау жұмыстарын жүргізуге қажетті ресурстармен қамтамасыз етілген. Ауданда бес элеватор жұмыс істейді. Бүгінде олар жаңа өнімнің 132 мың тоннадан астам астығын қабылдады.
Солтүстік Қазақстан облысында агроөнеркәсіп кешенін технологиялық жаңғырту жұмыстары жалғасуда. «Агро-Елецкое» ЖШС-де ауыл шаруашылығы техникасын ұшқышсыз басқару технологиясы сынақтан өткізілуде. Бұл технология егіс алқаптарындағы жұмыстардың дәлдігін арттырып, техниканы тиімді пайдалануға мүмкіндік береді.
Мемлекет басшысы агроөнеркәсіп кешенін цифрландыруға, ұшқышсыз және дәлме-дәл технологияларды кеңінен енгізуге ерекше мән беріп келеді. Бүгінде өңірде цифрлық шешімдерді өсімдік шаруашылығымен айналысатын 1 750 агроқұрылым және аралас бағыттағы 1 614 шаруашылық қолданады.
Жаңа технологияларды енгізумен қатар, «Агро-Елецкое» ЖШС егіс құрылымын әртараптандырып, жаңа дақылдарды игеруде. Биыл шаруашылық алғаш рет 1 мың гектарға жуық алқапты дәндік жүгері өсіруге бөлді. Бұл егіс құрылымын әртараптандырып, өсімдік шаруашылығының тиімділігін арттыруға мүмкіндік береді. Айыртау ауданына жұмыс сапары барысында облыс әкімі кәсіпорынның жұмысымен танысты.
Солтүстік Қазақстан облысының әкімі Ғауез Нұрмұхамбетов «Даму» кәсіпкерлікті дамыту қоры» АҚ басқарма төрағасы Фархат Сәрсекеевпен кездесті. Тараптар шағын және орта бизнесті қолдау, кәсіпкерлердің қаржыландыруға қолжетімділігін арттыру және аудандарда бизнесті дамытудың жаңа мүмкіндіктерін талқылады.
2026 жылы бірыңғай кешенді бағдарлама аясында жергілікті бюджеттен бөлінетін қаржы көлемі 2,8 млрд теңгеге дейін ұлғайтылды. «Іскер аймақ» бағдарламасы бойынша тағы 1,3 млрд теңге қарастырылған. Бүгінде жалпы сомасы 1 млрд теңгеден асатын 23 жоба мақұлданды. Жалпы, «Даму» қорымен ынтымақтастық кезеңінде өңірде 8,5 мың жоба қолдау тауып, олардың несие портфелі 761 млрд теңгеден асты.
Кездесуде ауыл кәсіпкерлеріне мемлекеттік қолдау шараларының қолжетімділігін арттыруға ерекше назар аударылды. Қордың мобильді фронт-офисі облыстың барлық ауданын қамтып, қазір ауылдық елді мекендерде жұмысын жалғастыруда. Сонымен қатар кәсіпкерлерге «бір терезе» қағидаты бойынша кеңес беріп, жобаларын сүйемелдеуге бағытталған бизнесті қолдау және сүйемелдеу орталығының пилоттық жобасы іске асырылуда.
Мемлекет басшысының цифрландыру жөніндегі тапсырмалары аясында аудандардағы креативті IT-орталықтарды кәсіпкерлермен жұмыс жүргізетін алаң ретінде пайдалану жоспарланып отыр. Бұл аудандар мен ауылдардағы бизнес өкілдерінің консультациялық қызметтерге, цифрлық сервистерге және мемлекеттік қолдау тетіктеріне қолжетімділігін арттыруға мүмкіндік береді.
Қазақстанда 7-13 қыркүйек аралығында өтетін Отбасы күніне арналған апталық басталды. Елімізде Отбасы күні дәстүрлі түрде қыркүйектің екінші жексенбісінде аталып өтеді.
Апта бойы еліміздің өңірлерінде отбасы құндылықтарын дәріптеуге, отбасындағы қарым-қатынас мәдениетін дамытуға және саналы ата-ана болудың маңызын түсіндіруге бағытталған ақпараттық, танымдық және қоғамдық іс-шаралар өтеді.
Апталықтың әр күні жеке тақырыпқа арналады. Бағдарлама ұрпақтар сабақтастығы, саналы түрде отбасын құру, бала денсаулығы мен қауіпсіздігі, отбасы берекесі және ата-ана мен баланың бірге уақыт өткізуі секілді маңызды тақырыптарды қамтиды.
Сондай-ақ әлеуметтік желілерде «Отбасымыздың бір күні» ұранымен жалпыұлттық #Otbasym2026 челленджі өтеді.
Жаңа оқу жылында Солтүстік Қазақстан облысында 439 мектеп жұмыс істейді. Бүгін 73 437 оқушы мектеп партасына отырады. Оның ішінде 6 мыңға жуық бүлдіршін алғаш рет мектеп табалдырығын аттап, бірінші сыныпқа барады.
Өңір басшысы ұстаздарды, оқушылар мен ата-аналарды Білім күнімен құттықтады.
«Құрметті ұстаздар, оқушылар және ата-аналар!Сіздерді Білім күнімен және жаңа оқу жылының басталуымен шын жүректен құттықтаймын! Білім – мемлекеттің тұрақты дамуы мен қоғамның әл-ауқатын қамтамасыз ететін басты құндылықтардың бірі. Білімді, жауапкершілігі жоғары, мақсатшыл жас ұрпақ – еліміздің басты капиталы әрі келешек дамуының берік негізі. Сондықтан балалардың сапалы білім алуына заманауи әрі қолайлы жағдай жасау – мемлекет алдындағы маңызды міндеттердің бірі.
Мемлекет басшысы білім сапасын арттыруға, ұстаздарды қолдауға және заманауи білім беру ортасын қалыптастыруға ерекше көңіл бөліп келеді. Бұл бағыттағы жүйелі жұмыс өңірімізде де жалғасуда. Мектептер мен балабақшалар жаңартылып, олардың материалдық-техникалық базасы нығайтылуда, балалардың сапалы білім алып, жан-жақты дамуына жаңа мүмкіндіктер жасалуда. Оқушыларға білімге деген құштарлық, өз күшіне сенім және толағай табыс, ұстаздарға кәсіби жетістік пен шәкірттерінің құрметін, ал ата-аналарға амандық пен балаларының жетістігіне қуана беруді тілеймін. Биыл облысымызда 6 мыңға жуық бала алғаш рет мектеп табалдырығын аттап, білім әлеміне қадам басады. Олардың білім жолы қызықты ізденістерге, жарқын жаңалықтар мен үлкен жетістіктерге толы болсын!»
Облыс әкімі Мамлют ауданына жұмыс сапары барысында егін жинау науқанының барысымен, мал шаруашылығының дамуымен, әлеуметтік және инфрақұрылымдық жобалардың іске асырылуымен танысып, аудан тұрғындарымен кездесті.
Қазір өңірде егін жинау науқаны қызу жүріп жатыр. Бүгінде облыс бойынша егіс алқаптарының 37%-дан астамы орылып, орташа өнімділік гектарына 14,6 центнерді құрап отыр. Биыл Мамлют ауданындағы егіс алқабы 185,1 мың гектарды құрады. Шаруашылықтар орақ науқанын жақсы қарқынмен жүргізуде, қажетті техника толық жұмылдырылған.
Мамлют ауданы – Қазақстанның Еңбек Ері Мұрат Қаражұмановтың туған жері. Ол бүгінде де туған өлкенің игілігі жолында еңбек етіп келеді. Оның ұлы Қайыргелді мен немересі Ернұр да отбасылық дәстүрді жалғастырып, егін алқаптарында жиі өнер көрсетіп, науқан кезінде еңбек адамдарына рух беріп жүр.
✔️Ауданда мал шаруашылығы да жүйелі дамып келеді. «Айтеке-БИ СК» ЖШС-де өңір басшысы сүт-тауарлы ферманың жұмысымен және ет бағытындағы асыл тұқымды мал репродукторларын құруға арналған жаңа нысандардың құрылысымен танысты. Ал «Мамбетов и К» КС-де заманауи технологиялар енгізілуде. Мұнда төлдерді азықтандыруға арналған тәжірибелік интеллектуалды станция жұмыс істейді.
✔️Ауданда бизнестің әлеуметтік жауапкершілігіне де ерекше көңіл бөлінуде. Ірі ауыл шаруашылығы кәсіпорындары өндірісті дамытумен қатар, ауылдардың әлеуметтік инфрақұрылымына да қаржы бағыттап келеді. «Айтеке-БИ СК» ЖШС Краснознаменное ауылында мәдени-демалыс орталығын, Петерфельд ауылында тұрғын үйлер салып жатыр. «Мамбетов и К» КС абаттандыру, сквер салу, тұрғын үй құрылысы және басқа да әлеуметтік жобаларды қолдауда. Жалпы аудан аграршылары әлеуметтік нысандарды дамытуға 785 млн теңге бағыттады.
✔️Сапар барысында инфрақұрылымдық жобалардың іске асырылу барысы да назардан тыс қалмады. Мамлютка қаласында «Жастар» стадионы қайта жаңғыртылуда. Токаревка ауылында сумен жабдықтау жүйесінің маңызды нысандарында жұмыстар басталды. Жоба аяқталғаннан кейін су жүйесінің сенімділігі артып, апаттық жағдайлардың туындау қаупі төмендейді.
✔️Ауданның цифрлық инфрақұрылымы да дамып келеді. «Ауыл Online» жобасы аясында 13 ауылда талшықты-оптикалық байланыс желілері тартылуда. Бұл тұрғындарды, мекемелер мен әлеуметтік нысандарды тұрақты әрі жоғары жылдамдықты интернетпен қамтамасыз етуге мүмкіндік береді. Жалпы облыс бойынша мұндай жұмыстар 264 ауылды қамтиды.
✔️Өңір басшысы сондай-ақ тұрғындары салауатты өмір салтын таңдаған облыстағы 51 елді мекеннің бірі – Бике ауылында болды. Мұнда футбол алаңы салынған, мектеп күрделі жөндеуден өтіп жатыр, мәдениет үйі жаңартылған, шағын бизнес дамуда. Одан бөлек, 93 жастағы ауыл тұрғыны Қайыркен Рахымұлы Бегеновтің шаңырағына да арнайы барып, хал-жағдайын білді. Қария ұзақ жылдар бойы туған өлкенің игілігі жолында адал еңбек еткен.
✔️Сапар соңында Мамлют ауданының тұрғындарымен кездесті. Жиында елді мекендерді дамыту, инфрақұрылым және әлеуметтік салаға қатысты өзекті мәселелер талқыланды. Көтерілген барлық өтініштер мен ұсыныстар назарға алынып, тиісті жұмысқа енгізілді.