Маңызды маман иегерлерінің мерекесі
Желтоқсанның 23-і күні аудан әкімдігінің үлкен залында еңбегі күн сайын ел тұрғындарының үйлеріне жарық пен жылуды қамтамасыз ететіндердің кәсіби мерекесі - Энергетика күніне арналған жылы салтанатты іс-шара өтті,
Мерекелік кездесуге аудан әкімі Мұрат Абдулов, аудандық мәслихат төрағасы, аудан әкімінің орынбасарлары, бөлім басшылары, энергетика саласының ардагерлері мен қызметкерлері қатысты.
Энергетиктерді кәсіби мерекемен құттықтай отырып, ауданымыздың бірінші басшысы биыл Энергетика күні алғаш рет ресми кәсіби мереке ретінде – желтоқсанның 22-сі күні аталып өтілетінін белгіледі. Тиісті шешім мемлекеттік деңгейде қабылданды және өткен жылы бекітілді. Бұрын мереке дәстүрлі түрде желтоқсанның үшінші жексенбісінде болатын, енді ол өзінің тұрақты күнін алды.
Сондай-ақ, аудан басшысы энергетик мамандығы барлық уақытта ең жауапты мамандықтардың бірі болғанын және болып қала беретінін атап өтті. Экономиканың, әлеуметтік саланың дамуы және адамның өмір сүру сапасы саланың тұрақты жұмысына аса байланысты. Аудан әкімі ауданның энергетикалық саласында болған оң өзгерістер туралы - материалдық-техникалық базаны нығайту, заманауи қосалқы станция салу, еңбек жағдайларын жақсарту және жалақының айтарлықтай өсуі туралы айтып берді. Мұның бәрі мамандықты тартымды және беделді етеді деп жеткізді.
Салтанатты кеште марапаттау рәсімі ерекше орын алды. Аудан әкімінің Құрмет грамотасымен сала ардагері, көп жылдар ішінде аудан энергетикасын дамытуға арнаған және мамандардың бірнеше буынын тәрбиелеген АЭЖ бұрынғы басшысы Орынбасар Жауаров марапатталды. Сондай-ақ, АЭЖ қызметкерлері Ержан Абдрахманов, Дархан Дайыров, Әділет Малаев, Бауыржан Рахметуллин және Махаббат Темірғалиеваға Құрмет грамоталары табыс етілсе, Алғыс хатпен Бекен Құдайқұлов марапатталды.
«Көкше Энерго» ЖШС директоры Тоқмағанбет Жармағанбетов, Рүстем Рахметуллин және Рүстем Омаровқа Құрмет грамоталары табысталды.
Әріптестер мен жиналғандарды құттықтай отырып, еңбек ардагері Орынбасар Жауаров бүгінде энергетиктер үшін жабдықты жаңартудан бастап жалақыны көтеруге дейін барлық қажетті жағдайлар жасалып жатқанын белгілеп өтті, бұл - мамандардың еңбегіне құрмет көрсетудің маңызды көрсеткіші.
«AMANAT» партиясы аудандық филиалының төрағасы Маржан Латыпова энергетиктерге шын жүректен алғысын білдіріп, электр қуаттың біздің өміріміздің ажырамас бөлігіне айналғанын және үйлердегі әдеттегі жарықтың артында энергетиктердің күнделікті, жауапты және жиі байқалмайтын жұмысы тұрғанын атап өтті.
Сондай-ақ, аудандық мәслихат төрағасы Сапар Сәниев пен АЭЖ басшысы Сабыржан Омаров құттықтап, әріптестері мен сала ардагерлеріне апатсыз жұмыс, зор денсаулық және отбасылық амандық тіледі.
Іс-шара аудандық Мәдениет үйінің қызметкерлері дайындаған шағын мерекелік концертпен аяқталды.