Солтүстік Қазақстан облысының грек-рим күресінің өкілі Ислам Евлоев халықаралық аренада жоғары деңгейдегі нәтижелерін тұрақты түрде көрсетіп, ел спортының абыройын асқақтатып келеді.
4–8 ақпан аралығында Хорватия астанасы Загреб қаласында күрес түрлерінен «Zagreb Open – 2026» рейтингілік турнирі өтті. Бұл жарыс әлемдік рейтингке ұпай беретін маңызды халықаралық бәсекелердің бірі саналады. 97 келіге дейінгі салмақ дәрежесінде сынға түскен Евлоев сенімді белдесулер өткізіп, финалға дейін жетті. Шешуші кездесуде ол Венгрия спортшысына 0:4 есебімен жол беріп, жарысты екінші орынмен аяқтады.
2025 жыл да балуан үшін табысты болды. Ол бірқатар ірі халықаралық турнирлерге қатысып, соның ішінде Сауд Арабиясының Эр-Рияд қаласында өткен VI Ислам ынтымақтастығы ойындарында өнер көрсетті. 87 келіге дейінгі салмақ дәрежесінде Ислам финалға шығып, әлем чемпионы атанған ирандық Голамреза Фарохимен белдесті. Қорытынды есеп – 0:6. Бұл жарыс Евлоев үшін Ислам ойындарындағы алғашқы қатысуы болды.
Ал 2024 жыл спортшының мансабындағы айрықша кезең ретінде тарихта қалды. Ислам Евлоев 82 келіге дейінгі салмақта жастар арасында (U20) әлем чемпионы атанып, Солтүстік Қазақстан облысының тарихындағы алғашқы әлем чемпионы болды.
Бүгінде Ислам Евлоев – қазақстандық грек-рим күресінің жарқын өкілдерінің бірі. Халықаралық жарыстардағы тұрақты нәтижелері оның кәсіби деңгейінің өскенін көрсетіп, алдағы ірі додаларда да жоғары жетістіктер күтуге негіз береді.