Мәдениеттердің өзара тоғысуы
Қазақстан Республикасы – елімізде тұрып жатқан этностардың әртүрлі мәдениеттерінен, дәстүрлерінен, әдет-ғұрыптарынан тұратын бірегей симбиозды білдіретін мемлекет. Көпэтносты Қазақстанды қалыптастырудың көптеген тарихи алғышарттары бар: қайғылы жер аудару, еңбек көші-қоны, тың жерлерді игеру және т.б.
Республика аумағында тәжік этносының пайда болу тарихы ХХ ғасырдың 20-30 жылдарынан басталды, осы уақытта Кеңес өкіметінің өкілдері жергілікті суармалы егіншілікті көтеру үшін қазіргі Қазақстанның оңтүстік жерлеріне мыңдаған тәжік отбасын көшірген. Сулы-батпақты жерлерде қоныстанған тәжіктер ондаған жылдан кейін бақтар мен бақшалар өсірді.
Қазақстанның солтүстігінде, негізінен Петропавл қаласында 1200 жуық тәжік тұрады. Аудандар бойынша тәжік этносы өкілдерінің көбі Мағжан Жұмабаев және Қызылжар аудандарында тұрады.
Этносаралық келісімді сақтау және нығайту саласындағы тиімді мемлекеттік саясаттың арқасында тәжік этносы өкілдерінің де өз мәдениетін, дәстүрлері мен әдет-ғұрыптарын сақтауға, ана тілін дамытуға мүмкіндігі бар. Айта кетсем, 2022 жылы облыстық Қазақстан халқы ассамблеясының базасында «Тәжіктердің республикалық этномәдени орталығы» республикалық қоғамдық бірлестігінің Солтүстік Қазақстан облысы филиалы құрылды, оны Убайдулло Мухибович Раджабов басқарады.
Орталық облыстық Қазақстан халқы ассамблеясының жұмысына белсенді қатысады, қалалық, облыстық, республикалық іс-шараларға қатысады. Этномәдени бірлестік қызметінің мақсаты Қазақстан халқының этносаралық келісімі мен жалпы ұлттық бірлігін нығайту, тәжік этносының мәдениетін, дәстүрлері мен әдет-ғұрыптарын сақтау және дәріптеу болып табылады. Мерекелік іс-шаралар аясында тәжік орталығының өкілдері шығармашылық нөмірлерімен өнер көрсетеді. Сонымен қатар, этномәдени бірлестік өңірде қайырымдылық мәдениетін қалыптастыру бойынша ауқымды жұмыс жүргізеді, аз қамтылған, көп балалы отбасыларға, ата-анасының қамқорлығынсыз қалған балаларға, мүгедектерге, зейнеткерлерге және т.б. көмек көрсетеді. Жаңа жыл қарсаңында аз қамтылған отбасылардан шыққан балаларға азық-түлік, киім-кешек сатып алу түрінде көмек көрсетілді. Орталық белсенділері тұрақты негізде СҚО бойынша ҚАЖД 48 мекемесіндегі Ашық есік күніне қатысады, онда палау әзірлеп таратады. Өткен жылы республикалық тәжік орталығымен қатар Қостанай облысында өрттен зардап шеккен адамдарға гуманитарлық көмек жіберілді.
2023 жылы бірқатар қайырымдылық акциялары өтті: ауызашар, Аққайың ауданы Ленинское ауылында палау тарату, СҚО бойынша ҚАЖД 48 мекемесінде палау әзірлеп тарату. Мамыр айында орталық өкілдері Отбасылық үлгідегі балалар ауылына барып, тәрбиеленушілерге 10 жұп аяқ киім табыс етті, сондай-ақ азық-түлік апарды.
Тәжіктер мәдениеті қазақтардың мәдениетімен тығыз байланысты. Біздің халықтарымызға мейірімділік, қонақжайлылық, рақымшылдық сынды жалпы адамзаттық қасиеттер тән. Қазақстан этностары мәдениеттерінің өзара тоғысуы рухани-адамгершілік және мәдени байытудың негізгі құралы ретінде әрекет етеді.
Раджабов Убайдулло
«Тәжіктердің республикалық этномәдени орталығы» РҚБ
СҚО филиалының төрағасы