Петропавлда Қарасай мен Ағынтай батырларды еске алды

Петропавловск қаласында Отан қорғаушылар күніне орай Қарасай батыр мен Ағынтай батыр ескерткішіне гүл шоқтарын қою рәсімі өтті. Театр алаңына жүздеген қала тұрғыны жиналып, ұлттық батырлардың рухына тағзым етті.

Салтанатты шараға Солтүстік Қазақстан облысының әкімі Ғауез Нұрмұхамбетов қатысты. Өңір басшысының атынан ескерткішке алғашқы гүл шоқтары қойылды.

Ұлттық қаһармандарды еске алуға ардагерлер, тыл еңбеккерлері, ҚР Ұлттық ұланы академиясының өкілдері, төтенше жағдайлар департаменті, полиция департаменті, шекара қызметі, прокуратура қызметкерлері, депутаттар, оқушылар, еңбек ұжымдары мен мемлекеттік мекемелердің өкілдері келді. Қатысушылар қолдарына жауынгерлік ерлік пен Жеңістің символына айналған қызыл қалампыр гүлдерін ұстады.

Жиналғандар үшін бұл рәсім Отан қорғаушылар күнін мерекелеудің бір бөлігі ғана емес, ұрпақтар сабақтастығын, жауынгерлік ерлікті және ел тарихына деген құрметті еске салған тағылымды шара болды.

Еске салсақ, Қарасай батыр мен Ағынтай батыр — XVII ғасырда өмір сүрген Қазақстанның ұлттық батырлары. Олар жоңғарларға қарсы шайқастарға қатысып, ел қорғауда ерекше ерлік көрсетті. Қарасай батыр халық жасақтарын басқарса, Ағынтай батыр қарсыластарымен жекпе-жекке шығып, батылдығымен танылған.

Батырлар дүниеден өткен соң қатар жерленген. Олардың кесенесі Айыртау ауданы аумағында орналасқан.