Петропавлда «Абайлаңыз, жұқа мұз!» акциясы өтті

Петропавл қаласындағы Пёстрое көлінің жағалауында республикалық «Заң және тәртіп» идеологемасын іске асыру аясында «Абайлаңыз, жұқа мұз!» атты ақпараттық-түсіндіру акциясы өтті. Іс-шара су айдындарындағы жазатайым оқиғалардың алдын алуға, тұрғындардың құқықтық мәдениетін арттыруға және жеке әрі қоғамдық қауіпсіздік мәселелеріне жауапкершілікпен қарауды қалыптастыруға бағытталды.

Акция барысында тұрғындарға мұздың тұрақсыз кезеңінде оған шығудың қауіптілігі түсіндіріліп, су айдындары маңында қауіпсіздік ережелерін сақтау қажеттігі еске салынды. Мамандар қарапайым сақтық шараларын елемеу қайғылы жағдайларға әкелуі мүмкін екенін ерекше атап өтті.

Ұйымдастырушылар акцияға қатысушыларға қауіпсіз және қауіпті мұздың белгілерін түсіндіріп, адам мұз астына түсіп кеткен жағдайда қандай әрекет жасау керектігін айтып берді. Профилактикалық әңгімелер мектеп оқушыларымен, студенттермен және қала тұрғындарымен жүргізілді.

Іс-шараның негізгі мақсаты - петропавлдықтардың құқықтық санасын, қауіпсіз мінез-құлық мәдениетін және заң мен қоғамдық тәртіп нормаларын сақтауға деген жеке жауапкершілігін қалыптастыру. «Абайлаңыз, жұқа мұз!» акциясы төтенше жағдайлардың алдын алуға, азаматтардың өмірі мен денсаулығын сақтауға бағытталған жүйелі профилактикалық жұмыстың бір бөлігіне айналды.