Солтүстік Қазақстан облысында су тасқынына дайындық күшейтілді

Солтүстік Қазақстан облысында су тасқыны кезеңіне дайындық жұмыстары жалғасуда. Тәуекел деңгейі орташа болғанымен, негізгі қауіп көктемгі су тасқынымен байланысты. Сондықтан өңір аудандарында елді мекендер мен инфрақұрылымды қорғау бағытында алдын алу шаралары күшейтілді.

Әсіресе Тайынша ауданында ауқымды жұмыстар атқарылып жатыр. Мұнда 12 елді мекен бақылауда. Ауданда жалпы ұзындығы 34,4 шақырымды құрайтын 15 қорғаныс бөгетінің жағдайы тексеріліп, нығайту жұмыстары жүргізілді. Тайынша қаласын қорғау үшін ұзындығы 3 шақырым, биіктігі 1,5 метр болатын қорғаныс үйіндісі жасақталған, 75 су өткізу құбыры жұмыс істеп тұр. Сорғы стансасын су басу қаупінің алдын алу үшін диаметрі 1 метр болатын құбыр орнатылды. Сонымен қатар, еріген қар суын өткізуге арналған үш тюбингтік өткел дайындалды. Донецкое ауылында ұзындығы 1200 метр болатын су ағатын арнаның арнасы тазартылып, кеңейтілді. Қазіргі уақытта арықтар, каналдар мен су өткізу құбырларын қар мен мұздан тазарту жұмыстары жалғасуда.

Аққайың ауданында да 12 елді мекен ерекше бақылауға алынған. Үлкен Тарангүл көлінің тасу қаупін азайту үшін ұзындығы 11,2 шақырым болатын жер бөгеттері нығайтылып, қосымша 2,7 шақырымға ұлғайтылды. 2026 жылға арналған су тасқынына қарсы іс-шаралар жоспары әзірленді. Су деңгейіне тұрақты мониторинг жүргізіліп, күштер мен құралдардың жедел әрекет етуге дайындығы қамтамасыз етілді.

Уәлиханов ауданында да қорғаныс шаралары күшейтілді. Қулыкөл және Қаратал ауылдарында жалпы ұзындығы 11 шақырым болатын қорғаныс үйінділері нығайтылды. «Көбенсай ауылына кіреберіс» автожолындағы су көтергіш бөгет күшейтілді. Наурыз айында Сілеті өзенінің сағасында мұзды қопсыту үшін жалпы аумағы 2000 шаршы метр болатын үш учаскеде жарылыс жұмыстары жоспарланған. Бұл өткен жылмен салыстырғанда 800 шаршы метрге артық.

Облыс аудандарында су тасқынына дайындық күшейтілген режимде жүргізілуде. Негізгі назар қарды уақытылы шығару, су бұру жүйелерін тазарту және су басу қаупі бар учаскелерді тұрақты бақылауда ұстауға аударылған. Барлық қызметтердің жұмысы ықтимал қауіптердің алдын алуға және жағдай өзгерген жағдайда жедел әрекет етуге бағытталған.