Дәрі-дәрмек үйге жақын: Қызылжар ауданында алғашқы жылжымалы дәріхана іске қосылды
Қызылжар ауданының шалғай ауылдарының тұрғындарына енді орталық ауруханаға барудың қажеті жоқ. Ауданда ауылдық округтерге барып, тегін дәрі-дәрмектерді сол жерде беретін жылжымалы дәріхана жұмысын бастады.
Бүгінде Қызылжар аудандық ауруханасында 4137 пациент тегін дәрі-дәрмек алады. Олардың басым бөлігі ауылдық жерлерде тұрады. Бұл мәселе әсіресе қарт адамдар үшін өзекті. Дәрі-дәрмек алу үшін зейнеткерлер аудан орталығына жетіп, кезек күтуге, кейін үйлеріне қайту үшін көлік іздеуге мәжбүр.
«Аудан әкімі, мәслихат депутаттары және басқарманың қолдауының арқасында бізге ауылдық округтердің барлығына дәрі-дәрмек жеткізетін жылжымалы дәріхана сатып алынды. Енді тегін дәрі-дәрмектерді тікелей тұрғындардың тұрғылықты жерінде беруге мүмкіндік бар», — деді Қызылжар аудандық ауруханасының директоры Смаил Сатин.
Жылжымалы дәріхана қажетті лицензиялаудан өтті. Оның жұмысына жүргізуші мен фармацевтер жұмылдырылады.
«Біз дәрі-дәрмектерді осында, орталық дәріханада тиеп, елді мекендерге бекітілген кестеге сәйкес шығамыз. Тұрғындарға жылжымалы дәріхана пунктінің белгілі бір күні және уақытта келетіндігі алдын ала хабарланады. Сол жерде дәрі-дәрмектер нақты уақыт режимінде қағаз рецепттер мен QR-кодтар арқылы беріледі», — деп түсіндірді аудандық аурухана дәріханасының меңгерушісі Галина Нечаева.
Жылжымалы дәріхананың аптасына бірнеше рет шығуы жоспарлануда. Маршрутқа ең шалғай орналасқан ауылдық округтер де енгізіледі. Жол бойында автокөлік амбулаторияларға да кіріп шығатын болады.
Арнайы автокөлік тоңазытқыш қондырғысымен жабдықталған. Температуралық режим дәрі-дәрмектер үшін ғана емес, ауылдық амбулаторияларға маршрут бойынша жеткізу жоспарланып отырған вакциналар үшін де маңызды.
Жылжымалы дәріханада дәрі-дәрмектердің кең түрін, оның ішінде балалар тағамы мен инсулинді беру мүмкіндігі қарастырылған. Таңбаланған тауарларға қатысты барлық операциялар онлайн режимде жүргізіледі. Дәрі-дәрмектің коды сканерленіп, оның берілгені жүйеде тіркеледі.
Қызылжар ауданының әкімі Бейбіт Исмановтың айтуынша, мұндай жобаның қажеттілігі тұрғындардың нақты өтініштерінен туындаған.
«Бұл — біздің өңірдегі алғашқы жылжымалы дәріхана. Егер тәжірибе өз тиімділігін көрсетсе, мұндай формат Солтүстік Қазақстан облысының басқа аудандарында да сұранысқа ие болуы мүмкін», — деп атап өтті Бейбіт Исманов.
Арнайы автокөліктің құны шамамен 36 млн теңгені құрады. Оны Алматы қаласында дайындау және қажетті құрал-жабдықтармен жабдықтау жұмыстары шамамен үш айға созылды.