Telegram-дегі «Тегін кітаптар» вирус болып шығуы мүмкін

Telegram-дегі «Тегін кітаптар» вирус болып шығуы мүмкін

Қазақстанның Бас прокуратурасы Telegram желісінде интернет-алаяқтықтың жаңа схемасы пайда болғаны туралы ескертті. Қаскөйлер вирустарды «тегін кітаптар» ретінде жасырып таратуда.

Ведомствоның мәліметінше, бәрі шектеусіз оқуға болатын үлкен электронды кітапхана туралы хабарламадан басталады. Пайдаланушы қажет кітапты сұрайды, ал бот өзін нағыз сервис сияқты ұстайды: кітаптың қысқаша мазмұнын береді. Алайда кітаптың орнына оны оқу үшін арналған «арнайы қосымша» деп таныстырылған файл жібереді. Мұндай файлды орнатқан жағдайда салдары өте ауыр болуы мүмкін: алаяқтар парольдерге, ақшаға, хат алмасуларға, фотосуреттерге қол жеткізіп, смартфонды қашықтан басқаруы және жеке деректерді ұрлауы мүмкін.

Бас прокуратура күмәнді дереккөздерден алынған кез келген қосымшалар қауіпті екенін еске салды. Ең қарапайым қорғаныс — бейтаныс боттар жіберген файлдарды орнатпау және кибергигиенаның негізгі ережелерін сақтау.