Аудан әкімінің жұмыс сапары

25 мамыр күні аудан әкімі Рүстем Мұқашұлы Елубаев Кішіқараой ауылдық округіне жұмыс сапарымен барып, елді мекендерді абаттандыру және әлеуметтік әрі өндірістік инфрақұрылымды дамыту бағытындағы жұмыстармен танысты.
Алғашқы нысан ретінде бүгінгі күні күрделі жөндеуді қажет ететін Кішіқараой ауылындағы су мұнарасы қаралды. Нысан басында аудан әкімі ауыл өкілдерімен, нысан қызметкерлерімен және мердігер ұйым өкілімен жұмыс кездесуін өткізіп, ауылды тұрақты ауызсумен қамтамасыз ету бағытындағы алдағы жұмыстарды талқылады. Кездесу қорытындысы бойынша ескі мұнараны бұзып, орнына жаңа заманауи су мұнарасын салу туралы шешім қабылданды. Жоба техникалық және жобалық-сметалық құжаттар дайын болғаннан кейін жақын уақытта басталатыны атап өтілді.
Одан кейін Рүстем Мұқашұлы Бостандық ауылындағы бірқатар нысандарды аралады. Мұнда ауылдық округті абаттандыру жөніндегі жасалған меморандум аясында жергілікті ауыл шаруашылығы тауарын өндірушілер әлеуметтік инфрақұрылымды дамытуға белсенді түрде үлес қосуда.
Нысандардың бірі — қалпына келтіру және жөндеу жұмыстары басталған екі қабатты әкімшілік ғимараты болды. Жөндеу жұмыстарын «Шалқар» шаруа қожалығының жетекшісі Ибрагим Саттыбайұлы Саттыбаев жүргізуде. Жөндеу аяқталғаннан кейін ғимаратта ауылдық округ әкімдігі аппаратының кабинеттері, конференц-зал, ауыл кітапханасы, учаскелік инспектор кабинеті және басқа да әлеуметтік маңызы бар бөлмелер орналастырылады. Кездесуге қатысушылардың айтуынша, жаңартылған нысан ауыл тұрғындары үшін маңызды қоғамдық орталыққа айналмақ.
Келесі нысан — «Ерлан» шаруа қожалығының жетекшісі Мендыбай Сағдатұлы Кипасов салып жатқан қонақүй үлгісіндегі жатақхана құрылысы болды. Жаңа кешенде шаруашылық қызметкерлері, мамандар мен ауыл қонақтарының тұруы және демалуы үшін барлық қолайлы жағдай жасалады. Жоба аясында заманауи бөлмелер, қажетті тұрмыстық жағдайлар және абаттандырылған аумақ қарастырылған.
Сонымен қатар аудан басшысы аталған шаруашылықтың астық кептіру кешенінің құрылыс жұмыстарымен де танысты. Нысанды аралау барысында мұндай жобалардың агроөнеркәсіп саласын дамытуға, өндірістік әлеуетті арттыруға және аудан экономикасына инвестиция тартуға ықпал ететіні атап өтілді. Заманауи өндірістік нысандардың салынуы жаңа жұмыс орындарын ашып, ауыл инфрақұрылымын нығайтуға мүмкіндік береді.
Жұмыс сапарының қорытындысы бойынша Рүстем Мұқашұлы ауылдық округтегі абаттандыру және даму жұмыстарына оң бағасын берді. Ол әлеуметтік бастамаларды жүзеге асыруға белсенді қатысып, ауылдың дамуына және тұрғындардың өмір сапасын жақсартуға үлес қосып жүрген ауыл шаруашылығы тауарын өндірушілерге алғысын білдірді.
Осындай бірлескен жобалар бизнестің әлеуметтік жауапкершілігінің және билік пен ауыл шаруашылығы құрылымдарының тиімді ынтымақтастығының жарқын үлгісі болып табылады. Инфрақұрылымды дамыту, елді мекендерді абаттандыру және тұрғындарға қолайлы жағдай жасау бағытындағы жүйелі жұмыстар ауылдық аумақтардың одан әрі дамуына және халықтың тұрмыс деңгейін арттыруға ықпал етеді.