Соңғы қоңырау — жаңа өмірге бастар жол

25 мамыр күні Киев орта мектебі қабырғасында соңғы қоңырау үні сыңғырлады. Бұл — түлектер үшін мектеп өміріндегі маңызды кезеңнің аяқталғанын білдіретін толқынысқа толы ерекше мереке болса, қалған оқушылар үшін жазғы демалыстың басталуын айшықтайтын қуанышты күн болды.
Салтанатты іс-шара мерекелік көңіл күйде өтіп, оған ұстаздар, ата-аналар, оқушылар, еңбек ардагерлері мен мектеп қонақтары қатысты. Дәстүр бойынша мереке Қазақстан Республикасының Мемлекеттік гимнін орындаумен басталып, жиналған қауымға арнаған құттықтау сөздермен жалғасты.
Бұл күні оқушылардың жетістіктеріне ерекше назар аударылды. Іс-шара барысында оқу озаттарына, сондай-ақ шығармашылық, зияткерлік және спорттық жарыстарда табысқа жеткен оқушыларға мадақтамалар табысталды. Көпшіліктің ыстық ықыласы мен қол шапалақтауы астында оқушылар өздерінің табандылығы, белсенділігі және еңбексүйгіштігі үшін лайықты марапаттарға ие болды.
Мектеп директоры Д.Қ. Исина құттықтау сөз сөйлеп, түлектерді мектеп бітіруімен құттықтады. Ол алда үлкен мүмкіндіктерге толы жаңа өмір, маңызды шешімдер мен жауапты кезең күтіп тұрғанын атап өтті. Мектеп басшысы түлектерге алға қойған мақсаттарына сенімді қадам жасап, емтихандарды сәтті тапсыруға және мектептегі жарқын сәттерді жүректерінде сақтауға тілектестік білдірді. Ал барлық оқушыларға жазғы демалысты жақсы өткізіп, жаңа оқу жылына тың күшпен оралуды тіледі.
Түлектер мен оқушыларды арнайы сапармен келген аудан әкімі Рүстем Мұқашұлы Елубаев құттықтады. Өз сөзінде ол сапалы білімнің маңыздылығын, білімге ұмтылу мен үнемі өзін-өзі дамыту қажеттігін атап өтті. Аудан басшысы жастарға биік белестерді бағындыруға, қиындықтан қорықпауға және туған жерін ешқашан ұмытпауға шақырды. Сонымен қатар туған өлкенің білімді, білікті және бастамашыл мамандарға мұқтаж екенін айтып, болашақта жастар туған ауданға оралып, оның дамуына үлес қосады деген сенім білдірді.
Білім ордасына қолдау көрсету мақсатында Рүстем Мұқашұлы мектеп директорына мектеп қажеттілігі үшін түрлі-түсті принтер сыйға тартты.
Сондай-ақ «Алтын Жер Агро» ЖШС басшысы Ж.А. Жағыпаров та түлектерге ізгі тілегін білдірді. Серіктестік атынан «Алтын белгіге» үміткер екі түлекке 100 мың теңгеден ақшалай сертификаттар табыс етілді. Ол кәсіпорын басшылығы дарынды әрі талапты жастарды әрдайым қолдауға дайын екенін атап өтті.
Түлектердің алғашқы ұстазы Ү.Т. Асқарованың сөзі ерекше әсерлі болды. Ол балалардың алғаш мектеп табалдырығын аттаған сәттерін еске алып, бүгінде олардың есейіп, жауапкершілігі жоғары, мақсаты айқын азамат болып қалыптасқанына мақтаныш білдірді. Ұстаздың жүрекжарды лебізі көпшілікке ерекше әсер сыйлады.
Түлектердің ата-аналары да құттықтау сөз сөйлеп, ұстаздарға балаларға берген білімі мен тәрбиесі, қамқорлығы мен төзімі үшін алғыстарын білдірді. Сонымен қатар олар түлектерге жарқын болашақ, дұрыс таңдау және армандарының орындалуын тіледі.
Мерекенің ерекше сәнін бірінші сынып оқушыларының өнері келтірді. Олар жоғары сынып оқушыларына арнап өлеңдер оқып, жүрекжарды тілектерін айтып, сәттілік пен үлкен жетістіктер тіледі.
Іс-шараның шарықтау шегі мектеппен қоштасудың белгісіне айналған соңғы қоңырау сәті болды. Ал мереке түлектердің әсерлі мектеп вальсімен аяқталып, онда қимастық сезім, жарқын естеліктер мен болашаққа деген үміт айқын көрініс тапты.
Соңғы қоңырау — бұл тек мектеппен қоштасу ғана емес, үлкен өмірге бастар жаңа кезеңнің бастауы. Алда түлектерді жаңа мақсаттар, асқақ армандар мен үлкен мүмкіндіктер күтіп тұр. Қай жерде жүрсе де, мектептегі балалық шақ, туған білім ордасы, ұстаздары мен достары олардың жүрегінде ең жарқын әрі ұмытылмас естелік болып сақталады.