Тазалық пен тәртіп жолындағы ортақ іс

«Таза Қазақстан» экологиялық акциясын жалғастыру аясында ауданда тазалық жұмыстарын жүргізу мен аумақтарды абаттандыру кең көлемде ұйымдастырылды. Мемлекеттік мекемелер мен ұйымдардың еңбек ұжымдары, жастар және аудан тұрғындары бірлесе отырып, қоршаған ортаға жауапкершілікпен қараудың жарқын үлгісін көрсетті.
Жұмыстар бекітілген аумақтарда — әлеуметтік маңызы бар нысандардың маңында, көшелерде және аула аумақтарында жүргізілді. Сенбілікке қатысушылар қоқыстарды жинап, айналаны ретке келтіріп, жаяу жүргіншілер жолдары мен қоғамдық орындарды тазалады. Нәтижесінде көшелер айтарлықтай көркейіп, таза әрі жинақы күйге енді, тұрғындарға жайлы орта қалыптасты.
Атқарылып жатқан жұмыстардың барысымен аудан әкімі Рустем Мұқашұлы Елубаев танысты. Ол бірнеше учаскені аралап, сенбілікке қатысушылармен тілдесіп, ұйымдастыру деңгейінің жоғары екенін және барлық буын өкілдерінің белсенділігін атап өтті. Аудан басшысы мұндай бастамалардың экологиялық мәдениетті қалыптастыруда маңызы зор екенін ерекше айтты.
Әсіресе аға буын өкілдерінің қатысуы ерекше атап өтуге тұрарлық. Ақсақалдар тобы Жеңіс саябағы алаңында тазалық жұмыстарын жүргізіп, ортақ іске өз үлестерін қосты. Олардың еңбегі мен өмірлік тәжірибесі жастарға өнеге болды.
Аталған аумақта аудан әкімі ақсақалдармен кездесу өткізіп, алдағы үш айлық аясындағы абаттандыру жоспарларымен бөлісті. Атап айтқанда, ағаштар мен көшеттер отырғызу, аумақтарды көгалдандыру және тұрғындарға қолайлы орта қалыптастыру жөніндегі жұмыстар сөз болды. Өз кезегінде ақсақалдар да өз пікірлері мен ұсыныстарын білдіріп, ауданның болашағына деген жанашырлықтарын көрсетті.
Кездесу барысында аға буынның тәлім-тәрбиесінің маңыздылығы мен жеке үлгінің жас ұрпақ үшін ерекше рөл атқаратыны атап өтілді. Осындай бірлескен жұмыстар арқылы еңбекке құрмет, туған жерге деген сүйіспеншілік және оны таза ұстау мәдениеті қалыптасады.
«Таза Қазақстан» экологиялық акциясы тағы бір мәрте бірлік пен ынтымақтың маңызын көрсетті. Тұрғындардың белсенділігі, билік тарапынан қолдау және ұрпақтар сабақтастығы ауданның дамуына берік негіз қалайды.