«Заң мен Тәртіп» тұжырымдамасын іске асыру: жастармен диалог

Ведомствоаралық комиссияның аудан әкімі Рүстем Мұқашұлы Елубаевтың төрағалығымен өткен практикалық бөлігі «QYRAN» IT-орталығында ұйымдастырылды. Іс-шараға аудан прокуроры Т.К. Төлегенов, аудандық полиция бөлімінің бастығы Ж.Қ. Рахметов, Талшық және Бестерек мектептерінің оқушылары, сондай-ақ бейнебайланыс арқылы қосылған ауылдық округтердің мектеп оқушылары қатысты.
«QYRAN» IT-орталығы кеңейтілген форматта маңызды іс-шараларды өткізуге арналған заманауи цифрлық алаң ретіндегі тиімділігін көрсетті. Қатысушыларға құттықтау сөз сөйлеген аудан әкімі Мемлекет басшысының бастамасымен жүзеге асырылып жатқан «Заң мен Тәртіп» тұжырымдамасының өзектілігін атап өтіп, оның тұрақтылықты, заңдылықты қамтамасыз етуге және әсіресе жастар арасында құқықтық мәдениетті қалыптастыруға бағытталғанын айтты.
Аудан басшысы бұл іс-шара облыста жаңадан ашылған үшінші IT-орталықта өткен алғашқы тақырыптық жиын екенін атап өтті. Бұл орталықтың сұранысқа ие екенін және цифрлық ортаны дамыту мен жауапты жастарды тәрбиелеудегі маңызын айқындайды. Жастар арасындағы құқық бұзушылықтардың өсуі жағдайында профилактикаға және салауатты ұрпақ қалыптастыруға ерекше назар аударылуда. «Сіздер – біздің болашағымыз», – деп атап өтті ол оқушыларға үндеу жасап.
Сондай-ақ аудан прокуроры мен полиция бөлімінің басшысы баяндама жасады. Прокурор Талғат Көшкімбайұлы қылмыстық және әкімшілік құқық бұзушылықтар бойынша статистикалық деректерді ұсынып, құқық бұзушылықтардың алдын алу мен халықтың құқықтық сауаттылығын арттыруға бағытталған «Айқын нәтиже» жобасының іске қосылғанын хабарлады. Қылмыспен күрес – бүкіл қоғамның ортақ міндеті екені атап өтілді.
Аудандық полиция бөлімінің басшысы Жанат Қуанышпайұлы есірткі қылмысына қарсы атқарылып жатқан жұмыстар туралы айтып, ауданда есірткіге тәуелділік бойынша есепте тұрған кәмелетке толмағандар жоқ екенін жеткізді. Алдын алу жұмыстары прокуратура және білім беру органдарымен бірлесіп тұрақты түрде жүргізілуде.
Іс-шара аясында нақты өмірлік оқиғаларға негізделген «Закладчик. Мать» деректі фильмі көрсетіліп, ол есірткі қылмыстарының ауыр салдарын айқын көрсетіп, жастарға ескерту ретінде ұсынылды.
Кездесу соңында оқушылар өздерін қызықтырған сұрақтарын қойды. Аудан әкімі әлеуметтік-экономикалық даму жоспарларымен бөлісіп, Мемлекет басшысы ерекше атап өткен «Таза Қазақстан» республикалық акциясына назар аударды. Әрбір азаматтың туған жерінің тазалығы мен көркеюіне жеке жауапкершілікпен қарауы маңызды екені айтылды. Іс-шара жылы әрі жігерлендіретін атмосферада өтіп, қатысушыларға жаңа жылда сәттілік пен ҰБТ-да жоғары нәтиже тілеу білдірілді.