АППАРАТ ОТЫРЫСЫ: ӨЗЕКТІ МӘСЕЛЕЛЕР ҚАРАЛДЫ
Шымкент қаласының әкімі Ғабит Сыздықбековтің төрағалығымен аппараттық кеңес өтіп, онда Қала күніне дайындық, өрт қауіпсіздігін қамтамасыз ету шаралары, мемлекеттік органдардың бұқаралық ақпарат құралдарымен өзара іс-қимылы, сондай-ақ, қалалық инфрақұрылым нысандарын алдағы жылыту маусымына дайындаудың аралық қорытындылары қаралды.
Мәдениет, тілдерді дамыту және архивтер басқармасының басшысы Бауыржан Орынтаевтың айтуынша, Қала күніне орай 17 мәдени-бұқаралық іс-шара өткізу жоспарланған. Мерекелік бағдарламалар 17-20 маусым аралығында қаланың түрлі алаңдарында, соның ішінде Арбатта, Қазақстан-Түркия достығы саябағында, Металлургтер және Шымсити саябағында өтеді. Сонымен қатар, этноауылда ұлттық дәстүрлер мен мәдениетті дәріптеуге бағытталған Этнофест фестивалі ұйымдастырылады.
Негізгі іс-шаралар 19 маусым күні Астана алаңында өтеді. Мұнда отандық және жергілікті өнерпаздардың қатысуымен гала-концерт ұйымдастырылады. Ал 20 маусымда Түркістан сарайында еліміздің өңірлерінен келген 12 ақынның қатысуымен республикалық айтыс өтеді. Сол күні кешке Астана алаңында қорытынды гала-концерт ұйымдастырылады.
Қалалық Төтенше жағдайлар департаменті басшысының міндетін атқарушы Тілеуберді Мәдиев қалада аудан әкімдіктерімен және өзге де қызметтермен бірлесіп өрттің алдын алу бойынша кешенді алдын алу жұмысы жалғасып жатқанын баяндады.
Аталған шаралар аясында 250 мыңнан астам тұрғын қамтылып, мамандар 96 мыңнан астам үйді аралады, түсіндіру жұмысын жүргізді. Мектептерде профилактикалық сабақтар, кәсіпкерлермен дөңгелек үстелдер ұйымдастырылып, бұқаралық ақпарат құралдары арқылы кең көлемді ақпараттық жұмыс атқарылды.
Нәтижесінде өрт саны – 27 пайызға, ал материалдық шығын көлемі 28 пайызға азайғаны атап өтілді.
Ішкі саясат басқармасының басшысы Азамат Пармановтың мәліметінше, жыл басынан бері БАҚ және әлеуметтік желілердегі 9,1 мыңнан астам материалға мониторинг жүргізілді. Мемлекеттік органдар мен қала әкімдігіне қатысты материалдардың 87,5 пайызы бойынша кері байланыс қамтамасыз етілген.
Мониторинг қорытындысы азаматтардың өтініштеріне жедел жауап беру, кері байланыстың сапасын арттыру және ресми ақпараттық ресурстарды тұрақты жаңартып отырудың қажеттігін көрсетті.
Энергетика және инфрақұрылымды дамыту басқармасының басшысы Рзабек Мендіқұлов өткен жылыту маусымының штаттық режимде өткенін хабарлады. Көп қабатты 2 154 үй мен 476 бюджеттік мекеме жылумен қамтамасыз етіліп, тіркелген барлық технологиялық ақау дер кезінде жойылған.
Жаңа маусымға дайындық аясында жылу желілерінде 127 гидравликалық сынақ жүргізіліп, анықталған ақаулар белгіленген кестеге сәйкес қалпына келтірілуде. Қазандықтарды, көп қабатты үйлерді және әлеуметтік нысандарды дайындау жұмысы жүргізілуде.
Сонымен бірге үйлердің бір бөлігінде сервистік ұйымдармен келісімшарттардың болмауы ішкі жылыту жүйелерінің дайындығына әсер етуде. Жалпы алғанда, алдағы жылыту маусымына дайындық жоспарлы жалғасуда.
Кеңес қорытындысында мегаполис басшысы Қала күніне арналған іс-шараларды сапалы ұйымдастыруды, өрт қауіпсіздігі шараларын күшейтуді және барлық инфрақұрылым нысандарының алдағы жылыту маусымына толық әрі уақтылы дайын болуын қамтамасыз етуді тапсырды.