ВАРШАВАДА ШЫМКЕНТТІҢ ТУРИСТІК МҮМКІНДІКТЕРІ ТАНЫСТЫРЫЛДЫ

Шымкент қаласының туризм және сыртқы байланыстар басқарамасы шаһардың туристік мүмкіндіктері мен инвестициялық тартымдылығын насихаттау, туристік ағынын арттыру және туристік өнімді жарнамалау мақсатында Варшавада роуд-шоу өткізді.

Роуд-шоу - «TT Warsaw 2022» халықаралық туристік көрмесі аясында ұйымдастырылды. Польшаның турбизнес өкілдерін қаламыздың туристік мүмкіндіктерімен, мерекелік іс-шаралармен, бағдарламалармен, туристік географиясымен таныстыру мақсатында өткен іс-шараға Димаш Құдайбергеннің Гданьск қаласынан жанкүйерлері арнайы келіп қатысып, Қазқстан және Шымкент қаласы туралы ақпарат алды.

Қатысушыларға Шымкенттің көрікті жерлері көрсетілген бейнероликтер көрсетіліп, қазақ халқының ұлттық тағамдары ұсынылды. VR-көзілдірік арқылы Шымқалаға виртуалды саяхат жүргізілді. Одан бөлек, терең тарихы бар шырайлы Шымкент шаhарының табиғаты мен ауа-райы адамдардың өмір сүруіне және саяхаттап келген туристерге де өте қолайлы екені айтылды. Сондай-ақ, шетелдік серіктестерге ойын-сауық турларынан бастап рекреациялық, іскерлік және экотуризмге дейінгі туристік қызметтердің барлық түрлерінің маршруты ұсынылды.

Бұл қадамдар туристік ағымды ұлғайту үшін ғана емес, сауда-экономикалық ынтымақтастықты арттыру, сапарлармен алмасу, өзара инвестициялар тарту, мемлекеттер арасындағы саяси диалогты кеңейту үшін де нәтиже береді деп күтілуде. Роуд-шоу барысында польшалық туроператорлар мен келушілер Шымкенттің туристік әлеуетін жоғары бағалай келе, туризм саласында бірлескен жобаларды ілгерілету үшін ынтымақтастықты жолға қоюға қызығушылық білдірді.