ЗАҢСЫЗ ҚҰРЫЛЫС ЖАУАПКЕРШІЛІККЕ ӘКЕП СОҒАДЫ

Шымкент қаласы әкімдігінің жауапты мамандары тұрғындардың шағымы бойынша заңсыз құрылыс фактісін анықтады. Қалалық орта сапасы және бақылау басқармасының қызметкерлері Ж.Адырбеков көшесі тұрғындарының жылу құбырына қатысты әлеуметтік желідегі алаңдаушылығы бойынша тексеру жүргізді. Нәтижесінде Еңбекші ауданы, Ж.Алдияров көшесі №70 мекенжайында үй салып жатқан азамат өз жер телімінің шекарасымен жүргізілген жылу құбырының 100 метрін тиісті рұқсат құжатсыз жердің астымен өткізіп жатқаны анықталды. Жауапты мамандар құрылыс жүргізушіге ҚР Сәулет, қала құрылысы және құрылыс қызметі туралы заң талаптарын сақтамай, жылу құбырын жобалау құжатынсыз, техникалық және авторлық қадағалаусыз және тиісті органга хабарлама жолдамай ауыстырғаны үшін жалпы көлемі 511 мың теңге айыппұл салды, сонымен қоса құбырды заңсыз ауыстыру жұмысын тоқтатуға және бастапқы қалпына келтіруге нұсқаулық берді. Осы ретте Қалалық орта сапасы және бақылау басқармасы қала тұрғындарына кез келген құрылысты бастар алдында қолданыстағы заң талаптарына сәйкес рұқсат алуды және құрылыс нормаларын қатаң сақтау қажеттігін ескертеді. Бұл талаптарды сақтамау ірі көлемдегі айыппұл салуға және заңсыз құрылысты мәжбүрлеп бұзуға себеп болуы мүмкін.