ШЫМКЕНТ: ҚАЗАҚСТАНДЫҚ ДӘРІ АЛҒАШ РЕТ ЕУРОПАЛЫҚ ОДАҚ НАРЫҒЫНА ЖІБЕРІЛДІ

Қазақстанда шығарылған дәрілік препарат алғаш рет Еуропалық одақ нарығына жөнелтілді. Болгарияға экспортталған алғашқы өнім партиясын халықаралық Polpharma Group құрамына кіретін, SANTO сауда белгісімен өнім шығаратын «Химфарм» АҚ өндірді.

Болгария Республикасына SIGLETIC 100 мг №28 препаратының 7 841 қаптамасы жөнелтілді. Құрамында ситаглиптин бар дәрілік зат екінші типті қант диабетімен ауыратын ересек науқастардың қанындағы глюкоза деңгейін бақылауда қолданылады.

Дәрінің алғашқы партиясы Шымкент қаласынан жіберілді. Жөнелту рәсіміне қала әкімі Ғабит Сыздықбеков, кәсіпорын басшылығы мен қызметкерлері, серіктестер және бұқаралық ақпарат құралдарының өкілдері қатысты.

Еуропа нарығына шығу өндірісті ауқымды түрде дайындаудың нәтижесінде жүзеге асып отыр. Еуропа нарығының талаптарына сай өнім шығару үшін кәсіпорын өндірістік қуаттарын жаңартып, халықаралық сапа стандарттарын енгізді.

2025 жылы еуропалық реттеуші органдар жүргізген инспекция қорытындысы бойынша «Химфарм» Еуропалық одақтың GMP талаптарына сәйкестік сертификатын алды. Бұл кәсіпорындағы өндірістік процестердің еуропалық талаптарға сәйкес екенін растады.

«Бүгін Шымкент қаласында Қазақстанның фармацевтика саласы үшін маңызды оқиға орын алды. Отандық дәрі алғаш рет Еуропалық одақ нарығына шықты. Бұл қазақстандық өндірістің халықаралық талаптарға сәйкестігін көрсетіп, экспорттық мүмкіндіктерге жаңа жол ашады», – деді қала әкімі Ғабит Сыздықбеков.

Айта кетейік, «Химфарм» кәсіпорнының тарихы 1882 жылдан басталады. 2011 жылдан бері кәсіпорын Polpharma Group құрамына кіреді. Бүгінде мұнда 967 адам еңбек етеді. Қолданыстағы өндіріс орнына құйылған инвестиция көлемі 130 млн АҚШ долларын құрайды.

Кәсіпорынның өндірістік қуаты жылына 1 млрд данаға дейін қатты дәрілік қалыптағы өнім шығаруға мүмкіндік береді. Зауытта таблеткалардан бөлек, инъекциялық және инфузиялық ерітінділер, ұнтақ түріндегі антибиотиктер және сұйық дәрілік заттар өндіріледі.

Компания өндіріс көлемін одан әрі ұлғайтуды жоспарлап отыр. Аумағы 17 гектар учаскеде құны 39,5 млрд теңге болатын жаңа инвестициялық жоба жүзеге асырылуда. Жоба аяқталғаннан кейін таблетка өндірісінің көлемі жылына 2 млрд данаға дейін артып, кәсіпорында 300-ге жуық жаңа жұмыс орны ашылады. Жобаны іске асыру мерзімі – 2026-2036 жылдар.

Қазақстандық дәрілік препараттың Еуропалық одаққа алғаш рет жеткізілуі отандық фармацевтика саласы үшін жаңа экспорттық бағытты ашады. Шымкент үшін бұл жоғары қосылған құны бар өнім өндірісін дамыту және жергілікті кәсіпорындардың халықаралық нарықтарға шығуының жаңа кезеңі.