ШЫМКЕНТТЕ РЕСПУБЛИКА КҮНІ — ХАЛЫҚТЫҚ ДУМАНҒА ҰЛАСТЫ

25 қазан - Республика күніне орай Шымкенттің жүрегі саналатын «Астана» алаңы мерекелік шаттыққа бөленді. Бұл күні қала тұрғындары мен қонақтары үшін кең ауқымды жалпыхалықтық іс-шаралар ұйымдастырылды.

Алаңда театр ұжымдарының қойылымдары, ұлттық салт-дәстүрге негізделген көріністер, дәстүрлі әншілер шеруі, сондай-ақ отандық баспа үйлері қатысқан кітап жәрмеңкелері мен тақырыптық көрмелер өтті. Әрбір көрініс пен әрбір ән — елдің тәуелсіздігін, бірлігін, мәдени байлығын паш етті.

Күннің шуақты сәтінде «Шымкент цирк» әртістері көрермендерге көтеріңкі көңіл-күй сыйласа, Өзбек драма театры, Қуыршақ театры мен қалалық кітапханалар ұжымы сахналық көріністер қойып, халықты қуанышқа бөледі. Алаңда жиналған көпшілік билеп, суретке түсіп, мерекенің сәнін кіргізді.

Мерекелік думанның басы-қасында жүрген Шымкент қалалық өзбек драма театрының директоры Рустамхан Сайтходжаев көпшілікті мерекемен құттықтап, шығармашылық ұжымдарға ризашылығын білдірді.

Республика күні - біздің ортақ Отанымыздың мерекесі. Бүгінгі алаңда барша этнос өкілдері бір шаңырақ астында шаттықпен бас қосып отыр. Басты мақсатымыз - халыққа қуаныш сыйлап, елдік рухты көтеру. Бүгін демалыс күні болса да, барлық ұжым осында - елмен бірге, - деді ол.

Алаңды думанға бөлеген бұл мереке бірлік пен достықтың, мәдени байлық пен ұлттық рухтың көрінісіне айналды. Қала тұрғындары үшін ұйымдастырылған іс-шаралар тәуелсіз еліміздің ең басты құндылығы – тұрақтылық пен татулықтың нақты дәлелі болды.