Құрметті ата-аналар! Әлеуметтік желілерде Шымкент қаласындағы оқушылардың оқулықтармен жеткіліксіз қамтамасыз етілуі және оқулықтардың сапасына қатысты түрлі ақпараттар таралуда.
Осыған байланысты Шымкент қаласының білім басқармасы мемлекеттік білім беру ұйымдарын оқулықтармен қамтамасыз ету жұмыстары жыл сайын жоспарлы түрде және қолданыстағы заңнама талаптарына сәйкес жүргізілетінін хабарлайды.
2025–2026 оқу жылында жергілікті бюджеттен 2 046 386 462 теңге көлемінде қаражат бөлініп, мемлекеттік білім беру ұйымдарын қамтамасыз ету мақсатында 554 382 дана оқулық сатып алынып, білім беру ұйымдарына уақытылы таратылды.
Ал 2026–2027 оқу жылына жергілікті бюджеттен 2 388 319 00 теңге көлемінде қаржы қарастырылып, оқулық қорын жаңарту, тозығы жеткен оқулықтарды ауыстыру және білім алушылардың қажеттілігін қамтамасыз ету мақсатында 11 баспадан 600 мыңға жуық оқулыққа тапсырыс берілді.
Қазіргі таңда тапсырыс берілген оқулықтарды Шымкент қаласына жеткізу жұмыстары жүргізілуде. Оқулықтар толық жеткізілгеннен кейін тозығы жеткен оқулықтар кезең-кезеңімен ауыстырылып, білім беру ұйымдарындағы оқулық тапшылығына қатысты мәселелер тиісті тәртіппен шешілетін болады.
Сонымен қатар, қолданыстағы заңнамаға, оның ішінде №91 бұйрықтың талаптарына сәйкес, оқулықтармен қамтамасыз ету мемлекеттік білім беру ұйымдары үшін жүзеге асырылады.
Ескерту: Оқулықтарды ұқыпты пайдалану және сақтап ұстау – білім алушылардың, ата-аналардың және білім беру ұйымдарының ортақ міндеті. Оқулық – бірнеше жыл бойы басқа да оқушылардың пайдалануына берілетін ортақ оқу құралы. Сондықтан әр оқушыдан берілген кітаптарды таза, ұқыпты ұстап, бүлдірмей сақтауды сұраймыз. Бұл – оқулықтардың ұзақ уақыт пайдаланылуына және оқу құралдарымен қамтамасыз ету сапасын арттыруға мүмкіндік береді.