ҚАЗАҚСТАННЫҢ ҮЗДІК ҒАЛЫМДАРЫ: 2024 ЖЫЛҒЫ ҒЫЛЫМ САЛАСЫНДАҒЫ СЫЙЛЫҚТАР МЕН СТИПЕНДИЯ ЛАУРЕАТТАРЫ МАРАПАТТАЛДЫ

Бүгін, 26 ақпанда, Алматы қаласында «Ғылым ордасы» ғимаратында ғылым саласындағы сыйлықтар мен мемлекеттік ғылыми стипендиялардың 2024 жылғы лауреаттарын салтанатты марапаттау шарасы өтті. Іс-шараға ҚР Ғылым және жоғары білім министрі Саясат Нұрбек, ҚР Президентінің жанындағы ҚР ҰҒА Президенті Ақылбек Күрішбаев, ҒЗИ және ЖОО басшылары, зиялы қауым өкілдері, ғалымдар мен оқытушылар қатысты.

ҚР Ғылым және жоғары білім министрі Саясат Нұрбек өз сөзінде Мемлекет басшысының ғалымдардың әлеуметтік мәртебесін көтеру және қолдау көрсету, сондай-ақ ғылымға жас кадрлардың келуін ынталандыру саясатының арқасында оң өзгерістер орын алғанын атап өтті. Мемлекет басшысының тапсырмасын іске асыру мақсатында 2024-2026 жылдарға арналған қолданбалы ғылымды мемлекеттік қаржыландыру көлемі ұлғайтылды, жас ғалымдарды қолдау шаралары күшейтілді, ғылымды дамыту және технологиялық саясатты іске асыруға бағытталған «Ғылым және технологиялық саясат туралы» Заң қабылданып, ғылыми ұйым қызметкерлерінің лауазымдық жалақылары артты, Ұлттық Ғылым академиясының институционалдық рөлі нығайды.

Сонымен қатар министр Қазақстанның еңбек сіңірген қайраткері, физика-математика ғылымдарының докторы, Қазақстан Ұлттық ғылым академиясының академигі Асқар Жұмаділдаевты туған күнімен құттықтап, оның ғылым мен білім саласындағы аса зор еңбегі мен жетістіктерін жоғары бағалады.

Салтанатты шара аясында министр Саясат Нұрбек сыйлықтар мен стипендиялар лауреаттарына дипломдар, төсбелгілер мен сертификаттар табыс етті. 2024 жылғы ғылым саласындағы атаулы сыйлық иегерлері:

Гуманитарлық ғылымдар саласындағы «Еуразия орталығының ежелгі және қазіргі заманғы халқының генетикалық тарихы: палеогенетика және Y-хромосоманың филогеографиясы тұрғысынан көзқарас» тақырыбындағы 2024 жылғы үздік ғылыми зерттеу үшін Шоқан Шыңғысұлы Уәлиханов атындағы сыйлықтың лауреаттары – Жабагин Мақсат Қизатұлы, Сабитов Жаксылык Муратович.
Жаратылыстану ғылымдары саласындағы «Жасыл экономика үшін материалдар мен энергия сақтау жүйелерінің инновациялық технологияларын дамыту» тақырыбындағы ұжымдық жұмысқа 2024 жылғы үздік ғылыми зерттеу үшін Қаныш Имантайұлы Сәтбаев атындағы сыйлықтың лауреаттары – Бакенов Жумабай Бекболатович, Конаров Айшуак Таргинович, Нурпейсова Арайлым Ахметбекқызы, Муканова Алия Оразалиновна, Умиров Нуржан Бердалыевич.
Педагогика саласындағы «Қазақстандағы нақты ғылымдар (STEM) саласындағы әйелдер тәжірибесін зерттеу» тақырыбындағы 2024 жылғы үздік ғылыми зерттеу мен жұмысы үшін Ыбырай Алтынсарин атындағы сыйлықтың лауреаты – Альмұхамбетова Айнұр Сабитовна.
Түркология саласындағы аса зор жетістіктері және «Ескі қазақ жазба ескерткіштерінің тіліндегі араб және парсы сөздері» тақырыбындағы 2024 жылғы үздік ғылыми жұмысы үшін Күлтегін атындағы сыйлықтың лауреаты – Сейтбекова Айнұр Аташбековна.
Жаратылыстану ғылымдары саласындағы «Болашақты құру: Тұрақты және икемді сымсыз желілердің келешек буынына арналған қайта-конфигурациялатын интеллектуалды беттер» тақырыбындағы 2024 жылғы үздік ғылыми жұмысы үшін Д.А.Қонаев атындағы жас ғалымдарға арналған сыйлықтың лауреаты – Наурызбаев Галымжан Еркинович.
Гуманитарлық ғылымдар саласындағы «Негізгі құндылықтардың лингвомәдениеттанулық және этнопсихолингвистикалық зерттеуі» тақырыбындағы 2024 жылғы үздік ғылыми жұмысы үшін М.О.Әуезов атындағы жас ғалымдарға арналған сыйлықтың лауреаты – Кузембаева Гульжана Айтжановна.

Сонымен қатар ҚР Президентінің жанындағы ҚР Ұлттық Ғылым Академиясының Президенті Ақылбек Күрішбаев мемлекеттік ғылыми стипендиялардың лауреаттарын марапаттады.

Жетекші ғалымдар мен жас ғалымдар 2024 жылғы мемлекеттік ғылыми стипендиялар конкурсының жеңімпаздары атанып, ғылым мен білім саласына қосқан үлестері үшін жоғары бағаланды. Марапатталған ғалымдар өз зерттеулерінде жаңа бағыттарды ашып, Қазақстанның ғылыми әлеуетін арттыруға зор үлес қосуда.