Study in Kazakhstan: Қазақстанның жоғары оқу орындары халықаралық ынтымақтастықты кеңейтіп жатыр

Amanzholov University халықаралық ынтымақтастықты кеңейтіп, шетел азаматтарын Қазақстанда білім алуға тарту жұмыстарын жалғастырып келеді. Қазіргі таңда университетте 170 шетел азаматы білім алып жатыр. Оның 124-і жоғары, сондай-ақ техникалық және кәсіптік білім беру бағдарламалары бойынша білім алады.

Негізгі контингент құрамында 97 бакалавриат студенті, 4 магистрант, 3 докторант, жоғары колледждің 17 студенті және академиялық ұтқырлық бағдарламасына қатысатын 3 студент бар. Бұдан бөлек, 46 шетел азаматы негізгі білім беру бағдарламаларына түсу үшін тілдік және дайындық курстарынан өтеді.

Бүгінде университетте 13 мемлекеттің азаматтары білім алады. Олардың ішінде Моңғолияның 63, Қытайдың 28, Ресейдің 11, Әзербайжанның 5 және Бангладештің 4 азаматы бар. Сонымен қатар университетте Қырғызстан, Өзбекстан, Ауғанстан, Палестина, Марокко, Индонезия, Түркия және Украина азаматтары білім алады.

2026 жылы шетелдік білім алушылардың географиясы Марокко, Индонезия, Бангладеш және Палестина азаматтарының келуімен кеңейді. Бұл шетелдік талапкерлердің Қазақстанда білім алуға деген қызығушылығы артып келе жатқанын көрсетеді.

Шетелдік студенттер педагогика, гуманитарлық және әлеуметтік ғылымдардан бастап жаратылыстану және техникалық бағыттарға дейінгі кең ауқымды білім беру бағдарламаларын таңдайды. Ең көп сұранысқа ие бағыттардың қатарында дене шынықтыру және спорт, педагогика, математика, шет тілдері, журналистика және ақпараттық технологиялар бар.

Шетелдік талапкерлерді тартуда Study in Kazakhstan платформасының маңызы зор. Amanzholov University өкілдері платформа аясында өтетін халықаралық білім беру көрмелеріне қатысып, Қазақстанның жоғары білім беру жүйесінің мүмкіндіктерін таныстырады және әлеуетті талапкерлерге университеттің білім беру бағдарламалары туралы ақпарат береді. Бұл жұмыс жаңа нарыққа шығуға және халықаралық ынтымақтастық географиясын кеңейтуге мүмкіндік береді.

Университет шетелдік ұйымдармен серіктестік байланыстарын да нығайтып келеді. Amanzholov University-дің халықаралық серіктестік желісі 33 мемлекетті қамтиды. Қазіргі таңда шетелдік ұйымдармен жасалған қолданыстағы келісімдердің саны 200-ге жетті. Оның ішінде 2026 жылы 24 жаңа келісім жасалды.

Халықаралық ынтымақтастық бірнеше бағыт бойынша жүзеге асырылады. Олардың қатарында бірлескен магистратура бағдарламасы, онлайн-курстар, академиялық ұтқырлық және халықаралық алмасу бағдарламалары бар. 2026 жылы университеттің 38 студенті академиялық ұтқырлық бағдарламаларына қатысады. Бағдарлама аясында олар Польша, Румыния, Литва, Италия, Малайзия, Қытай, Оңтүстік Корея, Өзбекстан, Түркия, Қырғызстан және Әзербайжан университеттерінде білім алады.

Шетелдік білім алушылар санының артуы, жаңа мемлекеттердің қосылуы және халықаралық серіктестік желінің кеңеюі Amanzholov University-дің қазақстандық білім беруді шетелде ілгерілету және еліміздің жоғары білім беру жүйесінің халықаралық тартымдылығын арттыру бағытындағы жүйелі жұмысының нәтижесін көрсетеді.