Қазақстанда авиация кадрларын даярлаудың халықаралық тәсілдері кеңейіп келеді

Азаматтық авиация академиясында Boeing компаниясы мен Istanbul Technical University мамандарының қатысуымен болашақ авиация мамандарының заманауи цифрлық, кәсіби және коммуникативтік құзыреттерін дамытуға бағытталған халықаралық білім беру бағдарламасы өтіп жатыр.

Оқыту халықаралық Upskilling Project жобасы аясында жүзеге асырылады. Бастаманың мақсаты – студенттердің академиялық даярлығын қазіргі еңбек нарығында сұранысқа ие практикалық дағдылармен толықтыру, сондай-ақ олардың кәсіби ортаға табысты бейімделуіне ықпал ету.

«Авиация мамандарын заманауи даярлау білім беру стандарттарының талаптарына ғана емес, саланың нақты сұраныстарына да сәйкес келуі тиіс. Сондықтан студенттерге жетекші халықаралық компаниялар мен университеттердің өкілдерінен тікелей практикалық тәжірибе алу мүмкіндігін ұсыну біз үшін маңызды. Мұндай бастамалар студенттердің кәсіби ой-өрісін кеңейтуге, цифрлық және коммуникативтік құзыреттерін дамытуға, сондай-ақ қарқынды өзгеріп жатқан авиация саласында жұмыс істеуге дайын болуына мүмкіндік береді», – деді Азаматтық авиация академиясының академиялық қызмет жөніндегі проректоры Қайрат Жақыпов.

Бағдарлама өзара толықтыратын екі бағытты – Digital Tools және Soft Skills қамтиды. Бұл тәсіл авиация саласының цифрлық трансформациясы жағдайында маңызы артып келе жатқан құзыреттермен студенттердің бейінді академиялық даярлығын толықтыруға мүмкіндік береді.

Академияның 100-ге жуық студенті Digital Tools бағыты бойынша оқытуға қатысты. Сабақ барысында олар заманауи цифрлық құралдармен, оның ішінде жасанды интеллект негізіндегі шешімдермен танысып, оларды оқу және кәсіби қызметте практикалық қолдану мүмкіндіктерін қарастырды. Soft Skills бағыты бойынша 25 студент практикалық сабақтардан өтті. Қатысушылар тиімді коммуникация, командалық жұмыс, презентация жасау және кәсіби өзара іс-қимыл дағдыларын дамытты.

Халықаралық бағдарламаны Istanbul Technical University профессоры, PhD Hülya Cebeci және Boeing компаниясының Анкарадағы мемлекеттік органдармен байланыс, стратегиялық және бизнесті дамыту жөніндегі директоры Filiz Hayirli Tepebasi үйлестіреді.

«Орталық Азияда авиация саласы қарқынды дамып келеді. Бұл үдерісті одан әрі ілгерілету үшін білімі терең, білікті әрі болашақ талаптарына сай мамандар қажет. Қазақстан Орталық Азиядағы авиация саласының дамуына серпін беріп, өңір елдерін байланыстыратын маңызды буынға айнала алады деп сенеміз. Сондықтан Boeing білім беруді дамытуға және авиация саласына қажетті білікті мамандар даярлауға тұрақты түрде қолдау көрсетіп келеді», – деп атап өтті Filiz Hayirli Tepebasi.

Халықаралық академиялық қауымдастық пен әлемдік авиация индустриясы өкілдерінің қатысуы студенттерге халықаралық практикалық тәжірибе жинақтауға, кәсіби даярлаудың заманауи тәсілдерімен танысуға және жұмыс берушілер талап ететін құзыреттерді тереңірек түсінуге мүмкіндік береді.

«Техникалық білім тиімді коммуникация, ынтымақтастық және мәселелерді шешу қабілетімен ұштасуы тиіс. Сондықтан бағдарлама аясындағы екі модуль студенттерге болашақ кәсіби қызметінде қажетті құзыреттерге жаңаша көзқараспен қарауға көмектеседі деп үміттенеміз. Бұл Қазақстанның авиация саласы мен экономикасын дамыту үшін аса маңызды», – деді Hülya Cebeci.

Оқу қорытындысы бойынша студенттер халықаралық білім беру бағдарламасына қатысқанын және тиісті құзыреттерді меңгергенін растайтын сертификаттарға ие болды.

Азаматтық авиация академиясы үшін болашақ құзыреттерді дамыту – салаға білікті кадрлар даярлаудың маңызды бағыттарының бірі. Халықаралық білім беру бастамалары оқытудың практикалық бағдарын нығайтуға, шетелдік академиялық және индустриялық серіктестермен ынтымақтастықты кеңейтуге, сондай-ақ студенттер, оқытушылар мен авиация саласының өкілдері арасында тәжірибе алмасу үшін жаңа мүмкіндіктер қалыптастыруға ықпал етеді.

Бағдарламаны іске асыру авиация кадрларын даярлаудың заманауи, цифрлық және құзыреттерге бағдарланған моделін дамыту бағытына сәйкес келеді. Бұл модельде академиялық білім практикалық дағдылармен және халықаралық тәжірибемен толықтырылады.