AI-Sana: Қарағанды индустриялық университеті жасанды интеллект құзыреттерін дамытады

Жасанды интеллект саласында мамандар даярлау бүгінде мемлекеттік саясатының басым бағыттарының бірі. Осы міндетті іске асыру мақсатында ҚР Ғылым және жоғары білім министрлігі студенттердің цифрлық құзыреттерін дамытуға және жасанды интеллект технологияларын білім беру үдерісіне енгізуге бағытталған AI-Sana бағдарламасын іске асырады.

Қарағанды индустриялық университеті AI-Sana бағдарламасына белсенді қатысып, студенттердің жасанды интеллект технологияларын меңгеруіне және оларды кәсіби қызметте қолдануына жағдай жасап келеді.

Университетте білім алушылардың жасанды интеллект саласындағы құзыреттерін қалыптастыру кезең-кезеңімен жүзеге асырылады. Алдымен барлық студент цифрлық сауаттылық негіздерін меңгереді. Кейін бейіндік пәндер аясында жасанды интеллект құралдарын қолдануды үйренеді. Ал IT бағытындағы студенттер бағдарламалау, машиналық оқыту және жасанды интеллект технологиялары бойынша тереңдетілген даярлықтан өтеді.

2025 жылы AI-Sana бағдарламасы аясында қазақстандық студенттер жасанды интеллектімен жұмыс істеудің базалық дағдыларын меңгерді. 2026 жылы бағдарламаның мазмұны кеңейтіліп, қатысушылар жасанды интеллект көмегімен бағдарламалау, машиналық оқыту, кәсіпкерлік және өз жобаларын әзірлеу бағыттарында білім алады. Үздік жобалар кейін Astana Hub алаңында акселерациядан өту мүмкіндігіне ие болады.

Қарағанды индустриялық университетінде жасанды интеллектіні қолдану оқу үдерісімен ғана шектелмейді. Университетте студенттер мен қызметкерлерге арналған мультиагентті цифрлық платформа жұмыс істейді. Оның құрамына оқу үдерісі, талапкерлерді қабылдау, академиялық ұтқырлық, студенттік іс-шаралар, академиялық адалдық және басқа да бағыттар бойынша мамандандырылған ЖИ-агенттер енгізілген.

Цифрлық экожүйенің негізін KarIU Smart Bot зияткерлік платформасы құрайды. Әрбір ЖИ-агент жеке білім базасы бар дербес сервис ретінде жұмыс істегенімен, бірыңғай бағдарламалық кешен, орталық пайдаланушылар тізілімі және деректер алмасу жүйесі арқылы өзара байланысқан. Платформа университеттің меншікті серверлерінде орналастырылған.

Сұранысқа ие цифрлық сервистердің бірі – Telegram платформасында жұмыс істейтін Smart Compliance AI-агенті. Ол сыбайлас жемқорлыққа қарсы іс-қимыл мәселелері бойынша ақпарат беріп, тестілеуден өтуге, электрондық анықтамалықты пайдалануға және практикалық жағдайлар бойынша кеңес алуға мүмкіндік береді.

Цифрлық сервистерді дамыту мақсатында университет Agent Generator атты меншікті конструктор әзірледі. Ол құрылымдық бөлімшелерге бағдарламашыларды тартпай-ақ жаңа AI-көмекшілер құруға мүмкіндік береді. Бұл цифрлық шешімдерді оқу және әкімшілік үдерістерге жедел енгізуге жағдай жасайды.

ЖИ-агенттермен өзара іс-қимыл Telegram-мен қатар басқа да цифрлық арналар арқылы жүзеге асырылады. Университетте қазақ, орыс және ағылшын тілдеріндегі сұраныстарды дауыстық форматта қабылдап, жауапты мәтіндік және дыбыстық түрде ұсынатын сенсорлық ақпараттық киоск орнатылған.

Университет қызметкерлеріне арналған басқару панелі ЖИ-агенттердің жұмысын бақылауға, пайдаланушылардың өтініштерін талдауға, білім базаларын басқаруға және ақпараттық материалдарды жаңартуға мүмкіндік береді. Жүйе жаңа цифрлық көмекшілерді әзірлеуге және қолданыстағы сервистерді университеттің өзекті қажеттіліктеріне бейімдеуге мүмкіндік береді.

Жасанды интеллект оқытушылардың да күнделікті қайталанатын жұмыстарын оңтайландыруға мүмкіндік береді. Атап айтқанда, оқу материалдары мен тапсырмаларды әзірлеу, сондай-ақ жұмыстардың жекелеген түрлерін тексеру үдерістерін автоматтандыруға болады. Бұл ретте білім алушылардың білімін бағалау бойынша түпкілікті шешім оқытушының құзыретінде қалады.

Университетте жасанды интеллект технологиялары кампус пен жатақханалардағы қауіпсіздікті қамтамасыз ету үшін де қолданылады. Зияткерлік бейнеаналитика жүйесі ықтимал төтенше жағдайларды жедел анықтауға және қауіпсіздік деңгейін арттыруға бағытталған.

Қарағанды индустриялық университетінде жасанды интеллектіні енгізу білім беру сапасын арттырумен қатар еңбек нарығына қажетті жаңа құзыреттерді қалыптастыруға бағытталған. Студенттер деректерді талдау, сыни ойлау, цифрлық құралдарды пайдалану және жасанды интеллект технологияларын кәсіби қызметте қолдану дағдыларын меңгеруде. Бұл AI-Sana бағдарламасының негізгі мақсаттарымен толық сәйкес келеді.