Батыс Қазақстан әдебиетінің жаңа қырлары ғылыми тұрғыда талданды

Бүгінгі «Қазақстандық ғалымдарды білесіз бе?» айдарында 50 жылға жуық уақытын білім беру ісін дамытуға, қазақ әдебиетін зерттеуге және елдің мәдени мұрасын сақтауға арнаған ғалым – профессор Зейнолла Мүтиев туралы айтып өтеміз.

Зейнолла Мүтиев – филология ғылымдарының кандидаты, М.Өтемісов атындағы Батыс Қазақстан университетінің профессоры, 300-ден астам ғылыми және оқу-әдістемелік жарияланымның, 14 монографияның, оқу құралдары мен әдеби хрестоматиялардың авторы. Ол ұзақ жылдар бойы қазақ әдебиетін, Батыс Қазақстан өңірінің әдеби мұрасын және қазіргі әдеби үдерісті зерттеп келеді.

Ғалымның маңызды ғылыми жетістіктерінің бірі – ҚР Ғылым және жоғары білім министрлігі Ғылым комитетінің 2023-2025 жылдарға арналған гранттық бағдарламасы аясында жүзеге асырылып жатқан «Жайық-Каспий өңірі ақын-жазушыларының әдеби мұрасы және қазіргі қазақ әдебиеті» атты ауқымды жоба.

Зерттеу барысында ғалым алғаш рет Жайық-Каспий өңіріндегі 40-тан астам ақын-жазушының шығармашылығына, соның ішінде қазіргі қазақ поэзиясы өкілдерінің еңбектеріне жүйелі талдау жасады. Бұл жұмыс Батыс Қазақстандағы заманауи әдебиеттің жаңа философиялық, көркемдік және тілдік ерекшеліктерін айқындауға мүмкіндік берді.

Зейнолла Мүтиевтің зерттеулері өңірдегі жас авторлардың шығармаларында адам, қоғам, рухани құндылықтар және адамның табиғатпен өзара байланысы туралы терең пайымдардың көрініс табатынын көрсетті. Ғалым қазіргі қазақ поэзиясының бірегей стилін қалыптастыратын көркемдік тәсілдер мен тілдік құралдарға ерекше назар аударды.

Ғылыми жұмыстың нәтижелері Қазақстанда ғана емес, шетелде де жоғары бағаланды. Ғалымның мақалалары Scopus және Web of Science базаларында индекстелетін халықаралық ғылыми журналдарда жарияланды. Зерттеулер негізінде еліміздің жоғары оқу орындары мен мектептерінде қолданылатын оқу бағдарламалары, оқу құралдары мен хрестоматиялар әзірленді.

Зейнолла Мүтиевтің ғылыми қызметі отандық филологияның дамуына, мәдени мұраны насихаттауға және ұлттық бірегейлікті нығайтуға елеулі үлес қосып келеді.

Біздің айдарымыздан қазақстандық ғалымдар мен олардың жаңалықтары жайлы көбірек біле аласыз, дәл осы зерттеушілер ел ғылымының өркендеуіне, білім мен мәдениеттің дамуына үлес қосып келеді.