Қазақстандық университет жасанды интеллект саласында MIT IDSS Еуразиядағы мүшесі атанды
Қазақстандық университет жасанды интеллект саласында MIT IDSS Еуразиядағы мүшесі атанды
Astana IT University Қазақстан, Орталық Азия және Еуразия кеңістігіндегі мамандарға қолжетімді жасанды интеллект пен деректер ғылымы саласындағы әлемдік деңгейдегі білімді қолдау мақсатында Массачусетс технологиялық институтының Деректер, жүйелер және қоғам институтына (MIT Institute for Data, Systems, and Society) қосылды. Бұл – Еуразия аймағындағы MIT IDSS-тің алғашқы ынтымақтастығы.
Екі университет арасындағы алғашқы келіссөздер 2025 жылдың күзінде басталды. Осы келіссөздер нәтижесінде Astana IT University IDSS Strategic Partnership in Education бағдарламасына қосылды. Бұл бағдарлама Astana IT University-дің жаһандық академиялық желідегі қатысуын кеңейтуге және жоғары оқу орнының оқу қызметіне озық тәжірибелер мен инновациялық тәсілдерді енгізуге мүмкіндік береді.
Жоба Мемлекет басшысы Қасым-Жомарт Тоқаев жариялаған Цифрландыру және жасанды интеллект жылы аясында іске қосылады. Қазақстан өңірлік технология көшбасшысы болуға бағыт ұстанды және Astana IT University мен MIT IDSS арасындағы ынтымақтастық оны тікелей жүзеге асырып, елдің адами әлеуетін жасанды интеллект пен деректер ғылымы саласындағы жаһандық күн тәртібін анықтайтын институтпен байланыстырады.
IDSS Strategic Partnership in Education бағдарламасының өзегін өзара толықтырушы екі бағыт құрайды. 12 апталық «AI and Data Science: Leveraging Responsible AI, Data and Statistics for Practical Impact» бағдарламасы жасанды интеллект, деректер ғылымы, машиналық оқыту, генеративті жасанды интеллект және деректермен жауапты жұмыс саласында қолданбалы база қажет мамандар мен басшыларға арналған. Мемлекеттік және жеке сектордың жасанды интеллект стратегиясы, этика және реттеу тоғысында шешім қабылдайтын жоғары басшыларына арналған 3 күндік «Fundamentals of AI for Leaders in Public and Private Sectors» интенсивін MIT IDSS-тің негізін қалаушы, профессор Мунтер Дале AI Week аясында 17-19 маусымда Astana IT University кампусында жүргізеді.
«Бұл ынтымақтастық жасанды интеллект пен деректер ғылымы саласындағы іргелі, тәжірибеге бағытталған білімге бүкіл әлемде қолжетімділікті кеңейтуге деген ұмтылысымызды бейнелейді. Әсіресе жасанды интеллект экономикалар мен қоғамды барған сайын өзгертіп жатқан кезде маңызды», – деді MIT-дегі электротехника және компьютерлік ғылымдар департаментінің (EECS) Уильям А.Кулидж атындағы профессоры және «Этикалық және жауапты жасанды интеллект» курсының оқытушысы Мунтер Дале. «Біз осы технологияларды әртүрлі өңірлер мен салаларда жауапты түрде пайдалануға қабілетті мамандарды дамытуды қолдауға қуаныштымыз», – деп атап өтті профессор Дале.
Екі бағыт та MIT IDSS оқу бағдарламалары негізінде жасалған және Массачусетс технологиялық институтының оқытушылары қолдайды. Бұл қатысушыларға аймақтан шықпай-ақ әлемдік деңгейдегі сарапшылармен жұмыс жасауға мүмкіндік береді. Бұл AITU-ды жергілікті таланттарды жасанды интеллект пен деректердің жаһандық болашағын қалыптастыратын білімге жалғастыратын кіру нүктесіне айналдырады.
«Astana IT University-дің MIT IDSS серіктестер желісіне енуі университет үшін де, бүкіл аймақ үшін де жаңа кезең ашады. Соның арқасында алдағы онжылдықтар бойы технологиялық күн тәртібін айқындайтын кадрлар даярланады. Әлемдегі топ университеттің тануы университеттің жоғары академиялық және институционалдық деңгейін растайды», – деп атап өтті Astana IT University ректоры Альтаир Ахметов.