Қазақстандық ғалымдарды білесіз бе? Білім мен инновация тоғысқан тұста

Ғылым – қоғам дамуының басты қозғаушы күші. Ал сол ғылымды алға сүйреп жүрген тұлғаларды танып-білу – әрқайсымыз үшін маңызды. Осы орайда ҚР Ғылым және жоғары білім министрлігі 12 сәуір – Ғылым қызметкерлері күні қарсаңында «Қазақстандық ғалымдарды білесіз бе?» атты жаңа танымдық айдарды бастады. Қазақстан ғылымының дамуына елеулі үлес қосып жүрген ғалымдармен таныса отырыңыздар.

Бүгінгі шығарылым педагогика ғылымдарының кандидаты, профессор Баян Қуанбаеваға арналады. Баян Ұлжағалиқызы жоғары білімін Е.Бөкетов атындағы Қарағанды мемлекеттік университетінде «Физик-оқытушы» мамандығы бойынша алған. Ғылыми-педагогикалық қызметін 1994 жылдан бастап бүгінгі күнге дейін Х.Досмұхамедов атындағы Атырау университетімен тығыз байланыстырып келеді. Қазіргі уақытта аталған оқу орнында зерттеуші-профессор ретінде еңбек етіп жатыр.

Ғалымның ғылыми-әдістемелік еңбектерінің саны 200-ден асады. Оның ішінде 5 монография, 43 ғылыми мақала, сондай-ақ Scopus және Web of Science халықаралық базаларында жарияланған зерттеулері бар. Сонымен қатар оның жетекшілігімен білім алушылар республикалық және халықаралық ғылыми байқауларда жүлделі орындарға ие болып келеді.

Баян Ұлжағалиқызының ғылыми қызметіндегі басты бағыттардың бірі – білім беру үдерісіне заманауи технологияларды енгізу. Қазіргі таңда ол физика пәнін оқытуда толықтырылған шынайылық (AR) технологияларын қолдануға арналған ғылыми жобаны жүзеге асырып жатыр. Бұл жоба аясында 7-сынып оқушыларына арналған интерактивті цифрлық оқулық әзірленген. Оқулықта күрделі физикалық құбылыстар динамикалық модельдер мен визуализациялар арқылы түсіндіріледі, бұл оқушылардың пәнге деген қызығушылығын арттырып, білім сапасын жақсартуға мүмкіндік береді.

Ғалымның ғылыми жаңалықтары тек теориялық деңгейде қалып қоймай, тәжірибеде де қолданыс тауып жатыр. Ол әзірлеген цифрлық оқулықтар оқу орталықтарында пайдаланылып, білім беру процесіне енгізілген. Сонымен қатар бұл өнімдер нарыққа шығарылып, тиісті келісімшарттар негізінде сатылымға ұсынылған. Бұл – ғылым нәтижелерінің коммерцияландырылып, нақты экономикалық пайда әкеліп отырғанының айқын дәлелі.

Баян Қуанбаеваның зияткерлік меншік саласындағы жетістіктері де назар аудартады. Оның екі пайдалы модельге патенті және бірнеше авторлық құқықтары бар. Бұл оның ғылыми ізденістерінің практикалық маңыздылығын көрсетеді.

Ғалымның еңбегі мемлекет тарапынан да жоғары бағаланған. Ол «Үздік оқытушы» грантының иегері атанып, «Ы.Алтынсарин» төсбелгісімен, сондай-ақ ғылымды дамытуға қосқан үлесі үшін бірқатар марапаттармен наградталған.

Қорыта айтқанда, Баян Ұлжағалиқызы – білім мен ғылымды ұштастыра отырып, заманауи технологияларды енгізу арқылы отандық білім беру жүйесінің дамуына үлес қосып жүрген білікті ғалым. Оның еңбектері жас ұрпақтың сапалы білім алуына, ғылымға қызығушылығының артуына және елдің зияткерлік әлеуетінің нығаюына қызмет етіп жатыр.

Осындай ғалымдарды танып, олардың еңбегін дәріптеу – қоғамның ғылымға деген құрметін арттырары сөзсіз.